၂၀၂၃ခုနှစ်၊ ပြည်နယ်နှင့်တိုင်းဒေသကြီး ရိုးရာခြင်းလုံးပြိုင်ပွဲနှင့် ပြေးခုန်ပစ် အားကစား ပြိုင်ပွဲများသို့ ဝင်ရောက်ယှဉ်ပြိုင်မည့် ဧရာဝတီတိုင်းဒေသကြီးကိုယ်စားပြု လက်ရွေးစင် အားကစားသမားများအား အောင်နိုင်ရေးအလံပေးအပ်ပွဲ အခမ်းအနားကို ယနေ့နံနက်ပိုင်းက  တိုင်းဒေသကြီးအစိုးရအဖွဲ့ရုံး ၊ အစည်းအဝေးခန်းမ(၁)၌ ပြုလုပ်ခဲ့သည်။ ဦးစွာ တိုင်းဒေသကြီးဝန်ကြီးချုပ်အား ပြည်နယ်နှင့်တိုင်းဒေသကြီး ရိုးရာခြင်းလုံးပြိုင်ပွဲနှင့် ပြေးခုန်ပစ်အားကစားပြိုင်ပွဲများသို့  ဝင်ရောက်ယှဉ်ပြိုင်မည့် အုပ်ချုပ်၊ နည်းပြ၊ အားကစားသမားများက တစ်ဦးချင်းမိတ်ဆက်ပြီး  ဧရာဝတီတိုင်းဒေသကြီးရိုးရာခြင်းလုံးနှင့် ပြေးခုန်ပစ် အသင်းအုပ်ချုပ်သူက ပြိုင်ပွဲဝင်ရောက်ယှဉ်ပြိုင်မည့် အစီအစဉ်များအား ရှင်းလင်းတင်ပြသည်။ ထို့နောက် တိုင်းဒေသကြီးဝန်ကြီးချုပ်က“၂၀၂၃ခုနှစ်၊ ပြည်နယ်နှင့်တိုင်းဒေသကြီး ရိုးရာခြင်းလုံး ပြိုင်ပွဲနှင့် ပြေးခုန်ပစ်အားကစားပြိုင်ပွဲများသို့ ဝင်ရောက်ယှဉ်ပြိုင်မည့် ဧရာဝတီတိုင်းဒေသကြီး ကိုယ်စားပြု လက်ရွေးစင်အားကစားသမားများနှင့် တွေ့ဆုံ၍ အောင်နိုင်ရေးအလံပေးအပ်ခြင်းနှင့် ချီးမြှင့်ထောက်ပံ့ငွေများ ပေးအပ်ခြင်းဖြစ်ပါကြောင်း၊ ရိုးရာခြင်းလုံး အားကစားနည်းကိုလိုက်စား၍ ခြင်းလုံးခတ်သည့်သူများ တိုင်းဒေသကြီး နေရာအနှံ့ တွင်ရှိနေပါကြောင်း၊ ရိုးရာခြင်းလုံးသည် မြန်မာ့ရိုးရာအားကစားနည်း တစ်ခုဖြစ်ပြီး ခြင်းလုံး အားကစားနည်းကို ခုံခုံမင်မင်ဖြင့် ကျန်းမာရေးအရ ကစားသူများရှိသကဲ့သို့ ပြိုင်ပွဲ ဝင်ရောက်ယှဉ်ပြိုင်နိုင်သည်အထိ ကစားနေသည့် အားကစားသမားများလည်း ရှိနေပါကြောင်း၊  ရိုးရာခြင်းလုံးအားကစားအဖွဲ့တွင် ဆီးဂိမ်းပြိုင်ပွဲ၌ ရွှေတံဆိပ်ဆု ရရှိသည့် အုပ်ချုပ်သူ၊ နည်းပြများဖြင့် လေ့ကျင့်ပြင်ဆင်ထားသည်ဖြစ်၍ ပြိုင်ပွဲတွင် ဆုတံဆိပ်များ ရရှိမည်ဟု မျှော်မှန်းပါကြောင်း၊ ပြေးခုန်ပစ်အားကစားနည်းတွင် ပါဝင်ယှဉ်ပြိုင်မည့် အားကစားသမားများအား အုပ်ချုပ်၊ နည်းပြ များအနေဖြင့် စနစ်တကျသင်ကြားလေ့ကျင့်ပေးလျက်ရှိရာ ပအောင်မြင်မှုများရရှိပြီး  ဆုတံဆိပ်များရရှိအောင် စွမ်းဆောင်နိုင်မည်ဟု ယုံကြည်ပါကြောင်း၊ အသင်းအုပ်ချုပ်သူ၊ နည်းပြ၊ အားကစားသမားများအနေဖြင့် မိမိတို့အသင်း အောင်မြင်မှုရရှိအောင် ဆထက်ထမ်းပိုး ဆောင်ရွက်သွားကြရန်နှင့် ကျန်းမာရေး နှင့်အညီ ဂရုတစိုက် နေထိုင်စားသောက်ကြရန် တိုက်တွန်းမှာကြားလိုပါကြောင်း” အမှာစကား များ ပြောကြားပြီး ၂၀၂၃ခုနှစ်၊ ပြည်နယ်နှင့်တိုင်းဒေသကြီး ရိုးရာခြင်းလုံးပြိုင်ပွဲနှင့် ပြေးခုန်ပစ် အားကစားပြိုင်ပွဲများသို့  ဝင်ရောက်ယှဉ်ပြိုင်မည့်  အားကစားအသင်းများမှ တာဝန်ရှိသူများထံသို့ အောင်နိုင်ရေးအလံနှင့် ချီးမြှင့်ထောက်ပံ့ငွေများ ပေးအပ်ခဲ့ကြောင်းသိရသည်။ ဆက်လက်၍ တိုင်းဒေသကြီး ဝန်ကြီးချုပ်သည် တာဝန်ရှိသူများနှင့်အတူ တိုင်းဒေသကြီးအစိုးရအဖွဲ့ရုံး၊ အစည်းအဝေးခန်းမ(၁)၌ပြုလုပ်သည့် ဧရာဝတီတိုင်းဒေသကြီးအတွင်းရှိ ရင်းနှီးမြှုပ်နှံမှုလုပ်ငန်းရှင်များနှင့် တွေ့ဆုံပွဲအခမ်းအနားသို့ တက်ရောက်၍ “ တိုင်းဒေသကြီးအတွင်း စိုက်ပျိုး၊ မွေးမြူရေးကိုအခြေခံသည့်  ရင်းနှီးမြှုပ်နှံမှုများကိုအဓိက ဆောင်ရွက်လျက်ရှိပါကြောင်း၊  ဆီဖူလုံရေးအတွက် ဖွဲနုဆီစက်တည်ဆောက်ရန်လည်း ကြိုးပမ်းဆောင်ရွက်လျက်ရှိပါကြောင်း၊ လုပ်ငန်းရှင်များအနေဖြင့် မိမိတို့လုပ်ငန်းများလည်ပတ်မှု တိုးတက်မှုအခြေအနေများအား တင်ပြပေးကြစေလိုကြောင်း၊  တိုင်းဒေသကြီးသည် မွေးမြူရေးလုပ်ငန်းများ ဖြစ်ထွန်းပြီး ကျွဲ၊ နွား၊ ဝက်၊ ဘဲ၊ ကြက်၊ ငါး၊ ပုစွန်၊ ဂဏန်းမွေးမြူရေးလုပ်ငန်းများလည်းဖြစ်ထွန်း အောင်မြင်လျက်ရှိ၍ တိရစ္ဆာန်အစာများထုတ်လုပ်ခြင်းလုပ်ငန်းများလည်းတိုးတက်ဆောင်ရွက်ကြရန်လိုပါကြောင်း၊ စိုက်ပျိုးရေးနှင့် ပတ်သက်၍ ဇီဝမြေဩဇာ၊ သဘာဝမြေဩဇာများ ထုတ်လုပ်နိုင်ရန်အတွက် အစီအမံများရှိပါကလည်း တင်ပြပေးကြစေလိုကြောင်း”အမှာစကားပြောကြားသည်။ ဆက်လက်၍ ရင်းနှီးမြှုပ်နှံမှုနှင့်ကုမ္ပဏီများညွှန်ကြားမှုဦးစီးဌာနမှ ညွှန်ကြားရေးမှူးက လုပ်ငန်းရှင်များနှင့်တွေ့ဆုံရခြင်းကိစ္စရပ်များအား ရှင်းလင်းတင်ပြီးနောက် MEF International Co., Ltd.က ရာခိုင်နှုန်းပြည့်မြန်မာနိုင်ငံသားရင်းနှီးမြှုပ်နှံမှုဖြင့် ကဏန်းပျော့တင်ပို့ရောင်းချခြင်းလုပ်ငန်း ဆောင်ရွက်နေမှုအားလည်းကောင်း၊ Shwe Wah Nadi Agriculture Production Co, Ltd.နှင့် Paddy Star Co., Ltd.တို့က ရာခိုင်နှုန်းပြည့်မြန်မာနိုင်ငံသားရင်းနှီးမြှုပ်နှံမှုဖြင့် ဆန်စပါးအခြေခံတန်ဖိုးမြှင့်ဆန်ထုတ်လုပ်ရောင်းချခြင်းလုပ်ငန်း ဆောင်ရွက်နေမှုအားလည်းကောင်း၊ Queen International Co., Ltd.က ရာခိုင်နှုန်းပြည့်မြန်မာနိုင်ငံသားရင်းနှီးမြှုပ်နှံမှုဖြင့် ကလေးကစားကွင်းလုပ်ငန်း ဆောင်ရွက်နေမှုအားလည်းကောင်း၊ Kyar Min Gyi Co., Ltd.က ရာခိုင်နှုန်းပြည့်မြန်မာနိုင်ငံသားရင်းနှီးမြှုပ်နှံမှုဖြင့် တိရစ္ဆာန်အစာခြောက်ထုတ်လုပ်ခြင်းလုပ်ငန်း ဆောင်ရွက်နေမှုအားလည်းကောင်း၊ Myanmar Rice Trading Co., Ltd.က ရာခိုင်နှုန်းပြည့်မြန်မာနိုင်ငံသားရင်းနှီးမြှုပ်နှံမှုဖြင့် ဆန်စပါးစိုက်ပျိုးထုတ်လုပ်ခြင်း၊ ကြိတ်ခွဲရောင်းချခြင်း၊ အထောက်အကူပြုဝန်ဆောင်မှုလုပ်ငန်း ဆောင်ရွက်နေမှုအားလည်းကောင်း၊ International Green Land Trading Co., Ltd. က ရာခိုင်နှုန်းပြည့်မြန်မာနိုင်ငံသားရင်းနှီးမြှုပ်နှံမှုဖြင့် ဆန်စပါး ကြိတ်ခွဲ ထုတ်လုပ် တင်ပို့ ရောင်းချခြင်း လုပ်ငန်းဆောင်ရွက်နေမှုအားလည်းကောင်း ရှင်းလင်းတင်ပြမှုများအပေါ် တိုင်းဒေသကြီးဝန်ကြီးချုပ်က လိုအပ်သည်များ ဖြည့်စွက်မှာကြားခဲ့ပြီး ‌ကုမ္ပဏီများ၏ တင်ပြချက်များအ‌ပေါ် သက်ဆိုင်ရာဌာနများနှင့်ပေါင်းစပ်ညှိနှိုင်းဆောင်ရွက်ပေးခဲ့သည်။

ဧရာဝတီတိုင်းဒေသကြီး ခရီးသွားလုပ်ငန်းဖွံ့ဖြိုးတက်ရေး လုပ်ငန်းညှိနှိုင်း အစည်းအဝေးကို ယနေ့နေလည်ပိုင်းက ဧရာဝတီတိုင်းဒေသကြီးအစိုးရအဖွဲ့ရုံး၊ အစည်းအဝေး ခန်းမ(၁)တွင်ပြုလုပ်ခဲ့ရာ တိုင်းဒေသကြီးဝန်ကြီးချုပ်ဦးတင်မောင်ဝင်း၊ တိုင်းဒေသကြီးအစိုးရ အဖွဲ့ဝင်များနှင့် ချောင်းသာ၊ ငွေဆောင် ဟိုတယ်ဇုန်များမှတာဝန်ရှိသူများ တက်ရောက်ခဲ့ ကြသည်။ ဦးစွာ တိုင်းဒေသကြီးဝန်ကြီးချုပ်က အမှာစကားပြောကြားရာတွင် " အောက်တိုဘာလသည် ပွင့်လင်းရာသီဖြစ်၍ ခရီးသွားများပိုမိုဝင်ရောက်လာတော့မှာဖြစ်ပြီး ခရီးသွားလုပ်ငန်း များပိုမိုဖွံ့ဖြိုးစေရေး သက်ဆိုင်ရာကဏ္ဍအလိုက် ကြိုတင်ပြင်ဆင်ဆောင်ရွက်လျက်ရှိပါကြောင်း၊ မိမိတို့အနေဖြင့် ယခင်နှစ်ခရီးသွားလုပ်ငန်း အားသာချက်အားနည်းချက်များကိုသုံးသပ်၍ ခရီးသွားလုပ်ငန်းပိုမိုတိုးတက်လာစေရေး ဟိုတယ်ဇုန်လုပ်ငန်းရှင်များ၊ ဌာနဆိုင်ရာများနှင့်တွေ့ဆုံဆွေးနွေး၍ လိုအပ်သည်များပေါင်းစပ် ဆောင်ရွက် ပေးခဲ့ပါကြောင်း၊ ကမ်းခြေခရီးသွားလုပ်ငန်းများကိုအခြေပြု၍ တိုင်းဒေသကြီးမှ ထွက်ရှိသည့် ကြိမ်၊ ဝါး၊ ဗေဒါ လက်မှုပစ္စည်းများ အပါအဝင် MSME လုပ်ငန်းများ ပိုမိုဖွံ့ဖြိုးလာမှာဖြစ်ပါကြောင်း၊ ခရီးသည်ဝင်ရောက်မှု ပိုမိုများပြားနိုင်၍ ကမ်းခြေသန့်ရှင်းသာယာ လှပစေရေး၊ အစားအသောက်နှင့်အသုံးအဆောင်ပစ္စည်းများ အဆင့်အတန်းရှိရှိဖြစ်စေရေး ကြိုတင်ပြင်ဆင်ဆောင်ရွက်ထားရန်နှင့် ဝန်ဆောင်မှုလုပ်ငန်းများလည်း လိုအပ်ချက်မရှိစေရေး ဆောင်ရွက်ရန်လိုပါကြောင်း၊ ခရီးသည်ဝင်ရောက်မှုများသည် တစ်နှစ်ထက်တစ်နှစ်ပိုမိုဝင်ရောက် လျက်ရှိ၍ ဟိုတယ်လုပ်ငန်း များ၊ တည်းခိုခန်းများအနေဖြင့် လိုအပ်ချက်များမရှိစေရေး စီစဉ်ဆောင်ရွက်ကြရန်လိုပါကြောင်း၊ ခရီးသွားများသွားလာရေး အဆင်ပြေစေရန်အတွက် လမ်းပိုင်းအားနည်းမှုများအပေါ် ရရှိသည့်ရန်ပုံငွေအပေါ်မူတည်၍ အဆင့်မြှင့်တင်ဆောင်ရွက် လျက်ရှိပြီး ယာဉ်လမ်းအန္တရာယ်ကင်းရှင်းရေးအတွက် အချက်ပြဆိုင်းဘုတ်များနှင့် လမ်းညွှန် ဆိုင်းဘုတ်၊ အသိပညာပေးဆိုင်ဘုတ်များ စိုက်ထူရန်လိုပါကြောင်း၊ ပြည်တွင်းပြည်ပ ခရီးသွားများ အနေဖြင့် အပန်းဖြေရုံသက်သက်မကဘဲ  တိုင်းဒေသကြီးရှိမြို့ကြီးများ၏ အထင်ကရနေရာများ၊ ရှေးဟောင်းအဆောက်အဦများနှင့် တခြားဆွဲဆောင်မှုရှိသည့်နေရာများရှာဖွေ၍ စိတ်ဝင်စား ဖွယ်ရာ၊ လေ့လာလည်ပတ်စရာခရီးစဉ်အသစ်များ ဖော်ဆောင်ရန်လိုအပ်ပြီး ခွင့်ပြုချက်များ ရယူဆောင်ရွက်ကြရမှာဖြစ်ပါကြောင်း၊ သတ်မှတ်အခွန်ပေးဆောင်ရန်လည်း ကြပ်မတ်ဆောင်ရွက် ရမှာဖြစ်ပါကြောင်း၊ ဟိုတယ်များ၊  တည်းခိုခန်းများအနေဖြင့် ခရီးသွားဝင်ရောက်မှုစာရင်းများမှန်ကန်ရန်လိုအပ်ပါကြောင်း၊ ကမ်းခြေများ၌  လာရောက်အပန်းဖြေသည့် ပြည်သူများအား ထိခိုက်မှုတစ်စုံတစ်ရာမရှိစေရေးနှင့် လုံခြုံမှုအပြည့်အဝရရှိစေရန်အတွက်လည်း ဆောင်ရွက်ရမှာဖြစ်ပါကြောင်း၊ ဟိုတယ်များအနေဖြင့် လျှပ်စစ်အလုံအလောက်ရရှိရန်အတွက် ဆိုလာစနစ်၊ လေအား စနစ်များဖြင့် အားဖြည့်ဆောင်ရွက်နိုင်ရေးဆောင်ရွက် နေပါကြောင်း၊  တစ်နှစ်ထက် တစ်နှစ် ခရီးသွားများပိုမိုတိုးတက်အောင် ကြိုးပမ်းဆောင်ရွက်ကြရမှာဖြစ်ပါကြောင်းနှင့် ခရီးသွားလုပ်ငန်းများ ပိုမိုဖွံ့ဖြိုးတိုးတက်ရန်အတွက် တက်ရောက်လာသူများကလည်း ဝိုင်းဝန်း အကြံပြုဆွေးနွေးပေးကြစေလိုကြောင်း”အမှာစကားများ ပြောကြားသည်။ ဆက်လက်၍ ဟိုတယ်နှင့်ခရီးသွားညွှန်ကြားမှုဦးစီးဌာန၊ ညွှန်ကြားရေးမှူးက ဧရာဝတီ တိုင်းဒေသကြီးအတွင်း ဟိုတယ်နှင့်ခရီးသွားကဏ္ဍဆိုင်ရာ အခြေအနေ၊ တိုင်းဒေသကြီးအတွင်း နှစ်အလိုက် ပြည်တွင်းပြည်ပခရီးသွားဧည့်သည် ဝင်ရောက်တည်းခိုမှုနှင့် ဝင်ငွေရရှိမှုအခြေအနေ၊ ၂၀၂၃ခုနှစ်၊ မဟာသင်္ကြန်ပွဲတော်ကာလအတွင်း ငွေဆောင်ကမ်းခြေနှင့် ချောင်းသာကမ်းခြေများသို့ ပြည်တွင်းပြည်ပခရီးသွားဧည့်သည်များ ဝင်ရောက်တည်းခိုမှုအခြေအနေ၊ ဒေသဆိုင်ရာ ခရီးသွားလုပ်ငန်းကော်မတီအစည်းအဝေးကျင်းပပြုလုပ်မှု အခြေအနေများအားရှင်းလင်းတင်ပြ ခဲ့ပြီးနောက် ချောင်းသာကမ်းခြေဟိုတယ်ဇုန်ဥက္ကဋ္ဌ၊ ငွေဆောင်ကမ်းခြေ ကော်မတီဒုတိယဥက္ကဋ္ဌ၊ စီးပွားရေးရာဝန်ကြီး၊ သယံဇာတရေးရာဝန်ကြီးနှင့် အစည်းအဝေးသို့တက်ရောက်လာသူများ၏ ခရီးသွားလုပ်ငန်းများ ဖွံ့ဖြိုးတိုးတက်ရေးအတွက် အထွေထွေဆွေးနွေးတင်ပြချက်များအပေါ် တိုင်းဒေသကြီးဝန်ကြီးချုပ်က လိုအပ်သည်များဖြည့်စွက်ဆွေးနွေးခဲ့ပြီး ပေါင်းစပ်ညှိနှိုင်း ဆောင်ရွက်ပေးခဲ့ကာ နိဂုံးချုပ်အမှာစကားများ ပြောကြားခဲ့သည်။

ကျန်းမာရေးဝန်ကြီးဌာနမှ ပါမောက္ခ၊ အထူးဆရာဝန်ကြီးများ၏ အထူးကုသရေးအစီအစဉ်အဖြစ် ဟင်္သာတမြို့ပြည်သူ့ဆေးရုံကြီးတွင် ပြည်သူများအား စက်တင်ဘာလ ၃၀ရက်နေ့မှ ယခုလ ၁ ရက်နေ့အထိ နှစ်ရက်တာဆေးကုသပေးနေမှုများကို တိုင်းဒေသကြီး ဝန်ကြီးချုပ်နှင့်ဇနီး၊ အစိုးရအဖွဲ့ဝင် ဝန်ကြီးများ၏ ဇနီးများသည် ယနေ့ညနေပိုင်းတွင် သွားရောက်ကြည့်ရှုအားပေးခဲ့သည်။ ဦးစွာ တိုင်းဒေသကြီးဝန်ကြီးချုပ်နှင့်တာဝန်ရှိသူများသည် ဟင်္သာတပြည်သူ့ဆေးရုံကြီးတွင် ကျန်းမာရေးဝန်ကြီးဌာနမှ ပါမောက္ခ၊ အထူးဆရာဝန်ကြီးများဖြစ်ကြသည့် ပါမောက္ခဒေါက်တာညိုညိုဝါ၊ ပါမောက္ခ၊ ဌာနမှူး(ဆေးပညာ)၊ ပါမောက္ခဒေါက်တာ ယဉ်မွန်သန့် (ရင်ခေါင်းဆေးကု)၊ ဒေါက်တာဝေလွင်ဇော်၊ တွဲဖက်ပါမောက္ခ(အရိုးအကြောအဆစ်ဆေးပညာ)၊  ဒေါက်တာအေးမြတ်ညိမ်း၊ အထူးကုဆရာဝန်ကြီး(ဦးနှောက်နှင့်အာရုံကြော)၊ ဒေါက်တာကြာညိုစိုးမြင့်၊ အထူးကုဆရာဝန်ကြီး(ဆီးချိုနှင့်ဟော်မုန်း)၊ ဒေါက်တာယဉ်ယဉ်ဝင်း၊ အထူးကုဆရာဝန်(ဆီးချိုနှင့်ဟော်မုန်း)၊ ဒေါက်တာမြင့်သိန်း၊ အထူးကုဆရာဝန်ကြီး(နှလုံးဆေးကု)၊ ဒေါက်တာရည်မွန်သန့်၊ အထူးကုဆရာဝန် (သွေးရောဂါ)၊ ဒေါက်တာကျော်ဇင်မြင့်၊ လက်ထောက်ဆရာဝန်(အသည်းဆေးကု)၊  ဒေါက်တာကောင်းထက်၊ လက်ထောက်ဆရာဝန်(ဉီးနှောက်နှင့်အာရုံကြောခွဲစိပ်)၁၁အဖွဲ့နှင့် ဟင်္သာတပြည်သူ့ဆေးရုံကြီးမှ အထူးကုဆရာဝန်ကြီးတို့မှ ပြည်သူများကို ဆေးကုသပေးနေမှုများကို ကြည့်ရှုအားပေးခဲ့ပြီး အထူးကုဆရာဝန်ကြီးများအား အမှတ်တရလက်ဆောင်ပစ္စည်းများ ပေးအပ်ခဲ့ပြီးနောက် တိုင်းဒေသကြီး ဝန်ကြီးချုပ်၊ အမျိုးသမီးရေးရာအဖွဲ့နာယက တိုင်းဒေသကြီး ဝန်ကြီးချုပ်၏ ဇနီးတို့က မျက်စိခွဲစိပ်လူနာများအတွက် မျက်မှန်များတပ်ဆင်ပေးခဲ့သည်။ ဆက်လက်၍ တိုင်းဒေသကြီး ဝန်ကြီးချုပ်နှင့် တာဝန်ရှိသူများသည် ကာကွယ်ဆေးအကြိမ်ပြည့် မရရှိသေးသော အသက် (၁)နှစ်မှ (၅)နှစ်အရွယ်ကလေးငယ်များကို Catch-up နည်းလမ်းဖြင့်ကာကွယ်ဆေးထိုးနှံ၊ တိုက်ကျွေးနေမှုများကို ကြည့်ရှုအားပေးခဲ့ပြီး ကြက်ဥများနှင့် အာဟာရဖြည့် စားသောက်ဖွယ်ရာများ ထောက်ပံ့ပေးအပ်ခဲ့သည်။ ကျန်းမာရေးဝန်ကြီးဌာနမှ ပါမောက္ခ၊ အထူးဆရာဝန်ကြီးများ၏ အထူးကုသရေးအစီအစဉ်ဖြင့် ဟင်္သာတမြို့ပြည်သူ့ဆေးရုံးကြီးတွင် နှလုံးရောဂါဆိုင်ရာလူနာ (၃၆)ဦး၊ သွေးရောဂါဆိုင်ရာလူနာ (၈)ဦး ဦးနှောက်နှင့်အာရုံကြော‌ ဆေးကုသမှုဆိုင်ရာ (၁၈) ဦး၊ အရိုးအကြောအဆစ်ဆိုင်ရာလူနာ(၅၃)ဦး၊ အသဲရောဂါကုသမှုဆိုင်ရာလူနာ (၁၄)ဦး၊ အထွေထွေရောဂါလူနာ (၃၇)ဦး ဆီးချိုနှင့်ဟောမုန်းဆိုင်ရာလူနာ(၃၃)ဦး၊ ဦးနှောက်နှင့်အာရုံကြောခွဲစိတ်ကုသဆိုင်ရာလူနာ (၁၀)‌ဦး၊ ရင်ခေါင်းဆေးကုသမှုဆိုင်ရာလူနာ (၁၄)ဦး၊ နား၊နှာခေါင်းလည်‌ချောင်းရောဂါဆိုင်ရာလူနာ (၂၁)ဦး၊ မျက်စိ‌ေရာဂါလူနာ (၈၆)ဦး၊ အရိုးရောဂါလူနာ (၄၄)ဦး၊ အထွေထွေခွဲစိတ်လူနာ (၁၅)ဦး၊ ကလေးရောဂါလူနာ (၁၁)ဦး၊ သားဖွားမီးယပ်ရောဂါလူနာ(၅၀)ဦး၊ အရေပြားရောဂါလူနာ(၄၂)ဦး၊ ကင်ဆာရောဂါလူနာ(၁၉)ဦး၊ သွားနှင့်ခံတွင်းလူနာ(၃၅)ဦး၊ ကိုယ်အင်္ဂါပြန်လည်သန်စွမ်းရေးလူနာ (၁၄)ဦး၊ ကြည့်ရှုလူနာစုစုပေါင်း (၅၆၀)ဦးတို့အားကျန်းမာရေးစောင့်ရှောက်မှုများဆောင်ရွက်ပေးနိုင်ခဲ့ကြောင်းသိရသည်။ ဆက်လက်၍ တိုင်းဒေသကြီး ဝန်ကြီးချုပ်နှင့်ဇနီး၊ အစိုးရအဖွဲ့ဝင် ဝန်ကြီးများ၏ ဇနီးများသည် ဇလွန်မြို့သို့သွားရောက်၍ မာရ်အောင်မြင်ပြည်တော်ပြန်မြတ်စွာဘုရားကြီးအား ပန်း၊ ရေချမ်း၊ ဆီမီးတို့ဖြင့် ကပ်လှူပူဇော်ခဲ့ပြီး တိုင်းဒေသကြီး ဝန်ကြီးချုပ်က ပြည်တော်ပြန်မြတ်စွာဘုရားကြီးအား ရွှေသင်္ကန်းများ ကပ်လှူပူဇော်၍ ဂန္ဓကုဋီတိုက်အတွင်းလှည့်လည်ကြည့်ရှုစစ်ဆေးပြီး ဂေါပကအဖွဲ့ထံသို့ အလှူငွေများပေးအပ်လှူဒါန်းခဲ့ကာ ဘုရားကြီးရှိ သာသနိကအဆောက်အဦများ၏မြန်မာမှုလက်ရာများ ရေရှည်တည်တံ့စေရေးထိန်းသိမ်းဆောင်ရွက်ရန်၊ လျှပ်စစ်မီးကြိုးများစနစ်တကျသွယ်တန်းထားရှိရန်၊ ဘုရားပရဝဏ် အတွင်းသန့်ရှင်းသပ်ရပ်မှုရှိစေရန်နှင့် အများပြည်သူများစိတ်အေးချမ်းသာစွာ ဘုရားဖူးကြည်ညိုနိုင်ရေးဆောင်ရွက်ရန်မှာကြားခဲ့သည်။

ဧရာဝတီတိုင်းဒေသကြီး ဝန်ကြီးချုပ်သည် တာဝန်ရှိသူများနှင့်အတူ ပုသိမ်မြို့၊ ဧရာရွှေဝါခန်းမ၌ ပြုလုပ်သည့် အပြည်ပြည်ဆိုင်ရာ သက်ကြီးရွယ်အိုများနေ့ အခမ်းအနားသို့ တက်ရောက်၍ “ ယနေ့ အောက်တိုဘာလ(၁)ရက်နေ့သည် ကမ္ဘာပေါ်က သက်ကြီးရွယ်အိုများ၏ အဖိုးထိုက်တန်မှု၊ နိုင်ငံ့တာဝန်များကျေပွန်ခဲ့မှု၊ ကမ္ဘာကြီးအပေါ် တတ်စွမ်းသမျှ စွမ်းဆောင်နိုင်ခဲ့မှုများကို လေးစားတန်ဖိုးထားပြီး ဂုဏ်ပြုကျင်းပသည့် အပြည်ပြည်ဆိုင်ရာသက်ကြီးရွယ်အိုများနေ့ ဖြစ်သည့်အတွက် တက်ရောက်လာသူ ဘိုးဘွားနှင့် တိုင်းဒေသကြီးအတွင်းရှိ ဘိုးဘွားများ လှိုက်လှိုက်လှဲလှဲ ဂုဏ်ပြုပါကြောင်းနှင့် သက်တော်ရာကျော်ရှည်ပါစေကြောင်း၊ သက်ကြီးပုဂ္ဂိုလ်များ၏ အခွင့်အရေးများကို အကောင်အထည်ဖော်ဆောင်ရာတွင် အနာဂတ်မျိုးဆက်သစ်လူငယ်များအနေဖြင့် သက်ကြီးပုဂ္ဂိုလ်များ၏ ဘဝကိုသိရှိနားလည်စေနိုင်ရန်၊ အလေးထားပြီး တန်ဖိုးထားချစ်ခင်တတ်စေရန် သက်ကြီးရွယ်အိုများဆိုင်ရာ ဥပဒေ၊ နည်းဥပဒေများပါ သက်ကြီးသူများ၏ အခွင့်အရေးများ သိရှိတန်ဖိုးထား တာဝန်ယူ‌ဆောင်ရွက်လာနိုင်စေရန်အတွက် ပြည်သူလူထုနှင့် လူငယ်များအားအသိပညာပေးခြင်း၊ ဂုဏ်ပြုအခမ်းအနားကျင်းပခြင်း၊ လူမှုရေးပင်စင်ထောက်ပံ့ပေးအပ်ခြင်း၊ သက်ကြီးပုဂ္ဂိုလ်များဦးဆောင်ပါဝင် ဆောင်ရွက်သည့် လူမှုအားမာန်အဖွဲ့( Inclusive Self Help Group- ISHG)များကို မိမိတို့ တိုင်းဒေသကြီးအပါအဝင် နိုင်ငံတစ်ဝန်းတွင် ဆောင်ရွက်လျက်ရှိပါကြောင်း၊ ယနေ့ခေတ်တွင် ကျန်းမာရေးစောင့်ရှောက်မှုများ တိုးတက်ကောင်းမွန်လာခြင်း၊ ကလေးမွေးဖွားမှုနှုန်း ကျဆင်းလာခြင်းတို့ကြောင့် ကမ္ဘာတစ်ဝန်း သက်ကြီးပုဂ္ဂိုလ်ဦးရေ တဖြည်းဖြည်းမြင့်တက်လာသည်ကို တွေ့ရှိရမှာဖြစ်ပါကြောင်း၊ ယခုနှစ် အပြည်ပြည်ဆိုင်ရာ သက်ကြီးရွယ်အိုများနေ့ အခမ်းအနားအတွက် ကုလသမဂ္ဂအဖွဲ့ကြီးက ချမှတ်ထားတဲ့ ဆောင်ပုဒ်သည် “သက်ကြီးသူများဘဝသာယာဖို့သက်ရွယ်စုံညီပါဝင်လို့ ဝိုင်းဝန်းဖြည့်ဆည်းကြပါစို့” “Fulfilling the Promises of the Universa Declaration of Human Rights for Older Persons: Across  Generations” ဖြစ်ပါကြောင်း၊ သက်ကြီးပုဂ္ဂိုလ်များကို လေးစားထိုက် ဂုဏ်ပြုတိုက်သူများအဖြစ် တန်ဖိုးထားပြီး ယခုလိုအခမ်းအနားကျင်းပပေးရုံ သက်သက်မဟုတ်ဘဲ သက်ကြီးပုဂ္ဂိုလ်များရဲ့ဘဝ လုံခြုံမှုရှိစေရေး၊ ယခုလိုအခမ်းအနားကျင်းပပေးရုံ သက်သက်မဟုတ်ဘဲ သက်ကြီးပုဂ္ဂိုလ်များရဲ့ဘဝ လုံခြုံမှုရှိစေရေး၊ ယင်းတို့၏ လုပ်ကိုင်နိုင်သော စွမ်းအားကို နိုင်ငံတော်ဖွံ့ဖြိုးတိုးတက်ရေး ကဏ္ဍများမှာ အသုံးပြုနိုင်ရန်အခွင့်အလမ်းများ ဖန်တီးပေးနိုင်ရေးများကို ဆောင်ရွက်သွားကြဖို့နဲ့ ယနေ့အခမ်းအနားသို့ကြွရောက် ချီးမြှင့်ပေးတဲ့ ဂုဏ်ပြုခံ သက်ကြီးပုဂ္ဂိုလ်များနဲ့တကွ တိုင်းဒေသကြီးအတွင်း မှာရှိတဲ့ သက်ကြီးပုဂ္ဂိုလ်များအားလုံး ကိုယ်၏ကျန်းမာခြင်း၊ စိတ်၏ချမ်းသာခြင်းတွေနဲ့ပြည်စုံကြပါစေကြောင်း” အမှာစကားပြောကြားသည်။ ယင်းနောက် တိုင်းဒေသကြီး ဝန်ကြီးချုပ်နှင့် ဖိတ်ကြားထားသော ဧည့်သည်တော်များသည် အပြည်ပြည်ဆိုင်ရာ သက်ကြီးရွယ်အိုများနေ့အထိမ်းအမှတ် မှတ်တမ်းဗီဒီယိုပြသမှုအားကြည့်ရှုအားပေးသည်။  ဆက်လက်၍ အခမ်းအနားသို့ တက်ရောက်လာသော အဘိုးအဘွားများအား တိုင်းဒေသကြီးဝန်ကြီးချုပ်နှင့် ဇနီးကလည်းကောင်း၊ အနောက်တောင်တိုင်းစစ်ဌာနချုပ် တိုင်းမှူးနှင့်ဇနီး၊ ပုသိမ်လေတပ်စခန်းဌာနချုပ်မှူးနှင့် ဇနီး၊ တိုင်းဒေသကြီး တရားလွှတ်တော်တရားသူကြီးချုပ်၊ အစိုးရအဖွဲ့ဝင် ဝန်ကြီးများနှင့် ဇနီးများက  ကန်တော့ငွေနှင့်ပစ္စည်းများ ထောက်ပံ့ပေးအပ်ပြီးခဲ့နောက် တိုင်းဒေသကြီးဝန်ကြီးချုပ်က ပုသိမ်၊ကျုံပျော်၊ မြောင်းမြနှင့် လပွတ္တာခရိုင်များရှိ ရိပ်သာတာဝန်ခံများထံသို့ ငွေပဒေသာပင်၊ အသက်အကြီးဆုံး အဘိုးအဘွားများအတွက် ဂုဏ်ပြုထောက်ပံ့ငွေနှင့် ရိပ်သာများရှိဘိုးဘွားများအတွက် ဂုဏ်ပြုထောက်ပံ့ငွေများကိုလည်းကောင်း၊  အနောက်တောင်တိုင်းစစ်ဌာနချုပ် တိုင်းမှူးက ဟင်္သာတ၊ မအူပင်၊ မြန်အောင်နှင့် ဖျာပုံခရိုင်များရှိ ရိပ်သာတာဝန်ခံများထံသို့ ငွေပဒေသာပင်၊ အသက်အကြီးဆုံး အဘိုးအဘွားများအတွက် ဂုဏ်ပြုထောက်ပံ့ငွေနှင့် ရိပ်သာများရှိဘိုးဘွားများအတွက် ဂုဏ်ပြုထောက်ပံ့ငွေများကိုလည်းကောင်း အသီးသီးထောက်ပံ့ ပေးအပ်ခဲ့ပြီး ကန်တော့ခံဘိုးဘွားများကိုယ်စား အဘွားတစ်ဦးမှ ကျေးဇူးတင်စကားပြန်လည်ပြောကြားခဲ့ပြီးနောက် တိုင်းဒေသကြီးဝန်ကြီးချုပ်နှင့်အဖွဲ့သည် ကန်တော့ခံဘိုးဘွားများအားရင်းရင်းနှီးနှီးအားပေးစကားများပြောကြားခဲ့သည်။ ဆက်လက်၍ တိုင်းဒေသကြီး ဝန်ကြီးချုပ်နှင့်အဖွဲ့သည် လူဝင်မှုကြီးကြပ်ရေးနှင့်ပြည်သူ့အင်အားဝန်ကြီးဌာန၊ ဧရာဝတီတိုင်းဒေသကြီး၊ ပုသိမ်မြို့၊ အမှတ်(၁၀) ရပ်ကွက်၊ မြို့ပြကောက်ကွက်(၁)၌ စာရင်းကောက်ကြီးကြပ်သူ၊ စာရင်းကောက်၊ တိုက်နယ်မှူး၊ မိတ်ဖက်အဖွဲ့အစည်းများဖြင့် အိမ်ထောင်စု(၃၂၅)၊ လူဦးရေ(၁၂၁၇)ဦးအား စမ်းသပ်သန်းခေါင်စာရင်း ကောက်ယူနေမှုများကိုကြည့်ရှုစစ်ဆေးခဲ့ပြီး စာရင်းကောက်ကြီးကြပ်သူမှ စမ်းသပ်သန်းခေါင်စာရင်းကောက်ယူနေမှု အခြေအနေများကို ရှင်းလင်းတင်ပြမှုအပေါ် တိုင်းဒေသကြီးဝန်ကြီးချုပ်မှ စာရင်းဇယားများတိကျမှန်ကန်စေရေး၊ သတ်မှတ်ကာလအတွင်းပြီးစီးစေရေးနှင့် ပြည်သူများသိရှိလိုက်ပါဆောင်ရွက်စေရေးမှာကြားခဲ့သည်။

(၅၉)နှစ်မြောက်မြန်မာနိုင်ငံရဲတပ်ဖွဲ့နေ့ အခမ်းအနားကို ယနေ့နံနက်ပိုင်းက ဧရာဝတီတိုင်းဒေသကြီး၊ ပုသိမ်မြို့၊ မြို့တော်ခန်းမ၌ ကျင်းပပြုလုပ်ခဲ့ပြီး (၅၉) နှစ်မြောက် မြန်မာနိုင်ငံရဲတပ်ဖွဲ့နေ့တွင် ဧရာဝတီတိုင်းဒေသကြီးရဲတပ်ဖွဲ့မှ (၁)နှစ်တာကာလအတွင်း အကြမ်းဖက်အဖွဲ့များ၏လက်နက်ခဲယမ်းအမြောက်အများ သိမ်းဆည်းရမိအောင်နှင့် အများပြည်သူစိတ်ဝင်စားပြီး ထူးခြားသည့်မှုခင်းများ၌ စွမ်းစွမ်းတမံဖော်ထုတ်ပေးခဲ့ကြသည့် ရဲတပ်ဖွဲ့ဝင်(၈၉)ဦးကို ဆုများချီးမြှင့်နိုင်ခဲ့ကြောင်းသိရပြီး အခမ်းအနားသို့ တိုင်းဒေသကြီးဝန်ကြီးချုပ်ဦးတင်မောင်ဝင်းနှင့် ဇနီး၊ အနောက်တောင်တိုင်းစစ်ဌာနချုပ်တိုင်းမှူးနှင့် ဇနီး၊ ပုသိမ်လေတပ်စခန်းဌာနချုပ်မှူးနှင့် ဇနီး၊ အစိုးရအဖွဲ့ဝင် ဝန်ကြီးများနှင့် ဇနီးများ၊ မြန်မာနိုင်ငံရဲတပ်ဖွဲ့ဝင်များနှင့် ဌာနဆိုင်ရာများ တက်ရောက်ခဲ့ကြသည်။ ဦးစွာ အခမ်းအနားကို ဧရာဝတီတိုင်းဒေသကြီးရဲတပ်ဖွဲ့မှ “မြန်မာ့ရဲ"သီချင်းဖြင့် ဂုဏ်ပြုသီဆိုဖွင့်လှစ်ခဲ့ပြီးနောက် တိုင်းဒေသကြီးဝန်ကြီးချုပ်က“ ယနေ့သည် မြန်မာနိုင်ငံရဲတပ်ဖွဲ့၏ နေ့ထူးနေ့မြတ်ဖြစ်သလို ရဲတပ်ဖွဲ့ဝင်များ၏နေ့သစ်လောင်းသည့် နေ့တစ်နေ့လည်းဖြစ်ပါကြောင်း၊ ရဲတပ်ဖွဲ့သည် ပြည်သူ့အကျိုးစီးပွားကို ကာကွယ်စောင့်ရှောက်လာခဲ့သည်မှာ ယနေ့တွင်( ၅၉ )နှစ် ပြည့်မြောက်ခဲ့ပြီဖြစ်ပါကြောင်း၊ ပြည်တွင်းလုံခြုံရေးကို တာဝန်ယူဆောင်ရွက်နေကြသည့် မြန်မာနိုင်ငံရဲတပ်ဖွဲ့အနေဖြင့် စိန်ခေါ်မှုအသစ်တွေကိုအမြဲမပြတ်ထိတွေ့နေကြရမှာဖြစ်၍ အသင့်ဖြစ်နေအောင် စီမံဆောင်ရွက်ထားကြဖို့လိုအပ်ပါကြောင်း၊ ပြည်တွင်းလုံခြုံရေးနှင့် တရားဥဒေစိုးမိုးရေးအတွက်ပြည်သူနဲ့အတူလက်တွဲပြီး ထိရောက်အောင်မြင်အောင်ကြိုးပမ်းဆောင်ရွက်နေကြရသကဲ့သို့ နယ်စပ်ဒေသလုံခြုံရေးကိုလည်း အထူးဂရုပြု ဆောင်ရွက်သွားကြရမှာ ဖြစ်ပါကြောင်း၊ မြန်မာနိုင်ငံရဲတပ်ဖွဲ့ကို ခေတ်နှင့်အညီ တိုးချဲ့ပြင်ဆင်ဖွဲ့စည်းထားရှိပြီး အင်တာပိုအဖွဲ့ဝင်နိုင်ငံဖြစ်တာနှင့်အညီ နိုင်ငံတကာရဲလုပ်ငန်းဆိုင်ရာများပူးပေါင်းဆောင်ရွက်မှု၊ မှုခင်းသတင်းအချက်အလက်ဖလှယ်မှုများအပြင်နိုင်ငံဖြတ်ကျော်မှုခင်းတိုက်ဖျက်ရေးဆိုင်ရာလုပ်ငန်းစဉ်များကိုလည်းပူးပေါင်းပါဝင်ဆောင်ရွက်လျက်ရှိပါကြောင်း၊ လုံခြုံရေးနှင့် တရားဥပဒေစိုးမိုးရေးလုပ်ငန်းများဆောင်ရွက်ရာမှာ မြန်မာနိုင်ငံရဲတပ်ဖွဲ့ဝင်များလိုက်နာရမယ့် အစဉ်အလာကောင်း (၁၂)ရပ်တွင်ပါရှိသည့် “နိုင်ငံတော်တွင်အရေးကြုံတိုင်းနောင်တော်တပ်မတော်နှင့်တစ်စိတ်တစ်ဝမ်းထဲလက်တွဲ၍ ကာကွယ်စောင့်ရှောက်ခဲ့သည့် တပ်ဖွဲ့ဖြစ်သည်” ဟူသည့်အချက်နှင့်အညီ တပ်မတော်နှင့် အတူလက်တွဲ၍ လက်ရှိ နိုင်ငံတော်ရဲ့ အခြေအနေကို တည်ငြိမ်အေးချမ်းအောင် ဆောင်ရွက်သွားကြရမှာဖြစ်ပါကြောင်း၊ ရဲတပ်ဖွဲ့၏ ရည်မှန်းချက်တာဝန် (၄)ရပ်ကို အောင်မြင်အောင် ဆောင်ရွက်ရာမှာ ရဲတပ်ဖွဲ့ဝင် တစ်ဦးချင်းဖြစ်စေ၊အဖွဲ့လိုက်ဖြစ်စေ ပူးပေါင်းပါဝင်ဆောင်ရွက်နေသည်ကို တပ်ဖွဲ့ဝင်တိုင်းကနားလည်ပြီး တာဝန်ကျေပွန်စွာ မှန်ကန်မွန်မြတ်သော စိတ်စေတနာကောင်းများဖြင့် ဆောင်ရွက်သွားကြဖို့လည်း တိုက်တွန်းလိုပါကြောင်း၊ တာဝန်တွေကို ဆောင်ရွက်ရင်းဖြင့် အသက်ပေးလှူခဲ့ရသည့်တပ်ဖွဲ့ဝင်များနှင့် ကိုယ်အင်္ဂါချို့ယွင်းဆုံးရှုံးခဲ့ရသည့် တပ်ဖွဲ့ဝင်တွေကိုလည်း အသိအမှတ်ပြု ဂုဏ်ပြုအပ်ပါကြောင်း၊  မြန်မာနိုင်ငံရဲတပ်ဖွဲ့ဝင် အဆင့်အတန်းအားလုံးသည် မိမိတို့၏ လုပ်ပိုင်ခွင့်၊ လုပ်ငန်းကျွမ်းကျင်မှုတွေနဲ့အတူ ဥပဒေကို ကိုင်တွယ်အသုံးပြုရာတွင် ပွင့်လင်းမြင်သာပြီး တာဝန်ယူမှု၊ တာဝန်ခံမှုပြုနိုင်သည့် ရဲတပ်ဖွဲ့ဝင်ကောင်းများဖြစ်အောင် ကြိုးပမ်းကြရန်နှင့်  ပြည်သူလူထု၏ အကျိုးစီးပွားကို ကာကွယ်စောင့်ရှောက်ရာမှာလည်း ရဲလုပ်ငန်း၊ ဥပဒေလုပ်ထုံးလုပ်နည်း၊ကျွမ်းကျင်မှု၊ရိုးသားဖြောင့်မတ်မှု၊သမာသမတ်ရှိမှုတို့ဖြင့် ဖြည့်ဆည်းဆောင်ရွက်ပေးနိုင်ရေးကို ရည်မှန်း၍လုပ်ငန်းတာဝန်တွေ အစဉ် ကြိုးပမ်းထမ်းဆောင်သွားကြပါလို့ တိုက်တွန်းပြောကြားလိုပါကြောင်း” အမှာစကားပြောကြားခဲ့ပြီးနောက် တိုင်းဒေသကြီးရဲတပ်ဖွဲ့မှူးက မြန်မာနိုင်ငံရဲတပ်ဖွဲ့ရဲချုပ်၏ သဝဏ်လွှာအားဖတ်ကြားသည်။ ဆက်လက်၍ တိုင်းဒေသကြီး ဝန်ကြီးချုပ်က ရဲချုပ်၏အမှုထမ်းကောင်းလက်မှတ်၊ တိုင်းဒေသကြီးရဲတပ်ဖွဲ့မှူး၏ သီးခြားအထူးဆုငွေရရှိသူများ၊ တိုင်းဒေသကြီး အစိုးရအဖွဲ့မှ ချီးမြှင့်ထောက်ပံ့ငွေများနှင့် အင်္ဂပူမြို့နယ်၊ ဒေးဒရဲမြို့နယ်နှင့် မော်လမြိုင်ကျွန်းမြို့နယ်တို့မှ ရဲမှုထမ်းဟောင်းများအတွက် ထောက်ပံ့ငွေများကိုပေးအပ်ရာ တာဝန်ရှိသူအသီးသီးက လက်ခံရယူခဲ့သည်။ ထို့နောက် အနောက်တောင်တိုင်းစစ်ဌာနချုပ် တိုင်းမှူးက ရဲချုပ်၏ အမှုထမ်းကောင်းလက်မှတ်နှင့် ဆုချီးမြှင့်‌ငွေ၊ တိုင်းတပ်ဖွဲ့မှူး၏ အမှုထမ်းကောင်းလက်မှတ်နှင့် တိုင်းဒေသကြီးရဲတပ်ဖွဲ့မှူး၏ သီးခြားအထူးဆုငွေ ရရှိသူများအားလည်းကောင်း၊ ပုသိမ်လေတပ်စခန်းဌာနချုပ်မှူးက တိုင်းဒေသကြီးရဲတပ်ဖွဲ့မှူး၏ အမှုထမ်းကောင်းလက်မှတ်နှင့် ဆုချီးမြှင့်ငွေ၊ တိုင်းဒေသကြီးရဲတပ်ဖွဲ့မှူး၏ သီးခြားအထူးဆုငွေ၊ တိုင်းတပ်ဖွဲ့မှူး၏ အမှုထမ်းကောင်းလက်မှတ်နှင့် ဆုချီးမြှင့်ငွေ ရရှိသူများအားလည်းကောင်း၊ လုံခြုံရေးနှင့်နယ်စပ်ရေးရာဝန်ကြီးက တိုင်းတပ်ဖွဲ့မှူး၏ အမှုထမ်းကောင်းလက်မှတ်နှင့် ဆုချီးမြှင့်ငွေ၊ တိုင်းဒေသကြီးရဲတပ်ဖွဲ့မှူး၏ အမှုထမ်းကောင်းလက်မှတ်နှင့် ဆုချီးမြှင့်ငွေ၊ တိုင်းဒေသကြီးရဲတပ်ဖွဲ့မှူး၏ သီးခြားအထူးဆုငွေရရှိသူများအားလည်းကောင်း ဆုများအသီးသီးချီးမြှင့်ခဲ့သည်။  ဆက်လက်၍ တိုင်းဒေသကြီး ဝန်ကြီးချုပ်နှင့်ဧည့်သည်တော်များသည် ရဲတပ်ဖွဲ့နေ့အထိမ်းအမှတ် Video Clip ပြသမှုအား ကြည့်ရှုအားပေးခဲ့ပြီးနောက် စုပေါင်းမှတ်တမ်းတင် ဓာတ်ပုံများရိုက်ကူးခဲ့ကာ (၅၉)နှစ်မြောက်မြန်မာနိုင်ငံရဲတပ်ဖွဲ့နေ့ အထိးမ်းအမှတ်အဖြစ် ပြသထားသော ပြခန်းများကို လှည့်လည်ကြည့်ရှုအားပေးခဲ့သည်။