အဂတိလိုက်စားမှုတိုက်ဖျက်ရေးဆိုင်ရာ အသိပညာပေးရှင်းလင်း ဆွေးနွေးခြင်း အခမ်းအနားကို ယနေ့နံနက်ပိုင်းက ပုသိမ်မြို့၊ ဧရာရွှေဝါခန်းမတွင် ကျင်းပ ပြုလုပ်ရာ အခမ်းအနားသို့ တိုင်းဒေသကြီးဝန်ကြီးချုပ် ဦးတင်မောင်ဝင်း၊ အဂတိလိုက်စားမှု တိုက်ဖျက်ရေးကော်မရှင်အဖွဲ့ဝင် ဦးကျော်စိုးလင်း၊ တိုင်းဒေသကြီးအစိုးရအဖွဲ့ဝင်များ၊ တိုင်း၊ ခရိုင်၊ မြို့နယ်အဆင့် ဌာနဆိုင်ရာများ တက်ရောက်ခဲ့ကြသည်။ ရှင်းလင်းဆွေးနွေးပွဲ အခမ်းအနားတွင် တိုင်းဒေသကြီးဝန်ကြီးချုပ်က "ယခုကဲ့သို့ အဂတိ လိုက်စားမှု တိုက်ဖျက်ရေးဆိုင်ရာအသိပညာပေး ရှင်းလင်းဆွေးနွေးခြင်းအခမ်းအနားများကို ကျင်းပခြင်းအားဖြင့် တိုင်းဒေသကြီးအတွင်းရှိ အစိုးရဌာန အဖွဲ့အစည်းများ၊ တိုင်း၊ ခရိုင်၊ မြို့နယ် အဆင့် တာဝန်သူများအနေဖြင့် အဂတိလိုက်စားမှုမြောက်နိုင်သည့် ကိစ္စရပ်များကို သိရှိနားလည် နိုင်မှာဖြစ်ပါကြောင်း၊ အဂတိလိုက်စားမှု၏ ဆိုးကျိုးများ၊ အဂတိလိုက်စားမှုတိုက်ဖျက်ရေး ဥပဒေပါ ပြဌာန်းချက်များနှင့် ပြစ်မှုပြစ်ဒဏ်များကို သိရှိနားလည်ပြီး အဂတိလိုက်စားမှု ဖြစ်ပေါ် နိုင်သည့် အကြောင်းအရာများကို ရှောင်ကြဉ်လာနိုင်မှာဖြစ်ပါကြောင်း၊ အဂတိလိုက်စားမှုသည် ကိုယ်ကျင့်တရားပျက်ယွင်းခြင်း ဖြစ်ပါကြောင်း၊ အဂတိလိုက်စားမှုကိုကျူးလွန်ပါက အဂတိ လိုက်စားမှုတိုက်ဖျက်ရေးဥပဒေနှင့် အရေးယူခံရမည့်အပြင် မိမိပတ်ဝန်းကျင်အသိုင်းအဝိုင်း တွင်လည်း ဂုဏ်သိက္ခာကျဆင်းမည်ဖြစ်သဖြင့် နိုင်ငံ့ဝန်ထမ်းများ သိရှိရှောင်ကြဉ်ရမည် ဖြစ်ပါကြောင်း၊ နိုင်ငံဝန်ထမ်းများသည် အစိုးရ၏မူဝါဒများကို အကောင်အထည်ဖော်ရာတွင် အဓိကအရေးပါသူများဖြစ်ပြီး နိုင်ငံတော်အစိုးရနှင့် ပြည်သူများအကြား ပေါင်းကူးတံတား ဖြစ်ပါကြောင်း၊ နိုင်ငံ့ဝန်ထမ်းများအနေဖြင့် ပြည်သူ့ဝန်ဆောင်မှုလုပ်ငန်းများဆောင်ရွက်ရာတွင် ဖြောင့်မတ်တည်ကြည်မှုရှိရန်၊ တာဝန်ယူ၊ တာဝန်ခံမှုရှိရန်၊ ပွင့်လင်းမြင်သာစွာဆောင်ရွက်နိုင်ရန် ကျောသား၊ ရင်သားမခွဲခြားဘဲ မျှတစွာဆောင်ရွက်ရမည်ဖြစ်ပါကြောင်း၊ အဂတိကင်းရှင်းစွာ ဆောင်ရွက်ပေးပါက ဝန်ထမ်းများအပေါ် ပြည်သူများက ယုံကြည်မှုရှိလာပြီး ဝန်ထမ်းများ၏ ပုံရိပ်ကောင်းမွန်လာမှာဖြစ်ပါကြောင်း၊ အဂတိကင်းရှင်းသည့် နိုင်ငံ့ဝန်ထမ်းများဖြင့် သန့်ရှင်းသောအစိုးရနှင့် ကောင်းမွန်သောအုပ်ချုပ်ရေးစနစ်ကို အကောင်အထည်ဖော် တည်ဆောက်ရမှာ ဖြစ်ပါကြောင်း၊ အဂတိလိုက်စားမှုတိုက်ဖျက်ရေးကော်မရှင်အနေဖြင့် အသိပညာပေးလုပ်ငန်း များအား တိုင်းဒေသကြီး/ပြည်နယ်အစိုးရအဖွဲ့များ၊ ပြည်ထောင်စုဝန်ကြီးဌာနများ၊ ပြည်ထောင်စု အဆင့်အဖွဲ့အစည်းများတွင် ကဏ္ဍစုံ၊ ထောင့်စုံမှ ထိရောက်ကျယ်ပြန့်စွာ ဆောင်ရွက်နေသည် ကိုလည်းသိရှိရပါကြောင်း၊ ယခုအခမ်းအနားသို့တက်ရောက်လာကြသည့် ဌာနဆိုင်ရာတာဝန်ရှိ သူများအနေဖြင့် အဂတိလိုက်စားမှုတိုက်ဖျက်ရေးနှင့်စပ်လျဉ်းသည့် အသိအမြင် ဗဟုသုတများကို မိမိပတ်ဝန်းကျင်၊ အဖွဲ့အစည်းများသို့ ပြန်လည်မျှဝေပေးကြရန်နှင့် အဂတိလိုက်စားမှု တိုက်ဖျက်ရေးလုပ်ငန်းစဉ်များတွင် ပါဝင်ဆောင်ရွက်ပေးကြရန်" တိုက်တွန်း အမှာစကား ပြောကြားခဲ့ပါသည်။ ဆက်လက်၍ အဂတိလိုက်စားမှုတိုက်ဖျက်ရေးကော်မရှင်အဖွဲ့ဝင် ဦးကျော်စိုးလင်းက အဂတိလိုက်စားမှုတိုက်ဖျက်ရေးနှင့်ပတ်သက်၍ ရည်ရွယ်ချက်များ၊ လုပ်ငန်းစဉ်များ၊ နည်းပညာဆိုင်ရာ သင်တန်းပို့ချမှုများ၊ အသိပညာပေး ဆွေးနွေးဟောပြောပွဲကျင်းပမှုများ၊ အဂတိလိုက်စား မှုတိုက်ဖျက်ရေးကော်မရှင်၏ ဆောင်ရွက်ချက်များနှင့်စပ်လျဉ်း၍ ရှင်းလင်းပြောကြားခဲ့ပါသည်။ ထို့နောက် တိုင်းဒေသကြီးဝန်ကြီးချုပ်နှင့် အခမ်းအနားသို့တက်ရောက်လာကြသူများက စုပေါင်း မှတ်တမ်းဓါတ်ပုံရိုက်ကူးခဲ့ပါသည်။ ထို့နောက် အဂတိလိုက်စားမှုတိုက်ဖျက်ရေးကော်မရှင်ရုံး၊ ညွှန်ကြားရေးမှူး ဦးအေးမင်းသောင်းက အဂတိလိုက်စားမှု သဘောသဘာဝများ၊ အဂတိလိုက်စားမှု၏ ဆိုးကျိုး သက်ရောက်မှုများနှင့် အဂတိလိုက်စားမှုတိုက်ဖျက်ရေးဥပဒေနှင့်စပ်လျဉ်း၍ ရှင်းလင်းဆွေးနွေးခဲ့ပြီး အခမ်းအနားသို့ တက်ရောက်လာသူများမှ သိရှိလိုသည်များအား ပြန်လည်မေးမြန်းဆွေးနွေး ခဲ့ပါသည်။

ဟိုတယ်နှင့်ခရီးသွားလာရေးဝန်ကြီးဌာနနှင့် ဧရာဝတီတိုင်းဒေသကြီးအစိုးရအဖွဲ့တို့၏ စီစဉ်ကြီးကြပ်မှုဖြင့် ဟိုတယ်နှင့်ခရီးသွားညွှန်ကြားမှုဦးစီးဌာနနှင့်တိုင်းဒေသကြီးစည်ပင်သာယာရေးအဖွဲ့၏ ပူးပေါင်းစီစဉ်ဖွင့်လှစ်သည့် ဧည်သည်စာရင်းစီမံခန့်ခွဲမှုစနစ် (Guest List Management System - GLMS) သင်တန်းကို ယနေ့နံနက်ပိုင်းက ပုသိမ်မြို့၊ မြို့တော်ခန်းမတွင် ကျင်းပပြုလုပ်ခဲ့ရာ တိုင်းဒေသကြီးဝန်ကြီးချုပ်ဦးတင်မောင်ဝင်း၊ တိုင်းဒေသကြီးအစိုးရ အဖွဲ့ဝင်များ၊ ဌာနဆိုင်ရာများနှင့် ပုသိမ်မြို့ရှိ တည်းခိုခန်းမှကိုယ်စားလှယ်များ တက်ရောက် ခဲ့ကြသည်။ ဦးစွာ တိုင်းဒေသကြီးဝန်ကြီးချုပ်မှ ဧရာဝတီတိုင်းဒေသကြီးသည် ငွေဆောင်၊ ချောင်းသာကဲ့သို့ ထူးခြားသောကမ်းခြေများရှိခြင်းတို့ကြောင့် ခရီးသွားဧည့်သည်များ၊ နှစ်စဉ် တိုးတက်ဝင်ရောက်လျက်ရှိတာကို တွေ့ရှိရပါကြောင်း၊ ၂၀၂၃ ခုနှစ်၊ ဇန်နဝါရီလမှ ဒီဇင်ဘာ လကုန်အထိ ပြည်တွင်း၊ ပြည်ပခရီးသွားဧည့်သည် (၁၆)သိန်းကျော်ဝင်ရောက်တည်းခိုခဲ့ပြီး ၂၀၂၄ ခုနှစ်၊ ဇန်နဝါရီနှင့် ဖေဖော်ဝါရီ (၂) လတာကာလမှာ ဧရာဝတီတိုင်းဒေသကြီးအတွင်း ခရီးသွားဧည့်သည် (၃)သိန်းကျော်ဝင်ရောက်တည်းခိုခဲ့ပြီးဖြစ်ပါကြောင်း၊ ဧရာဝတီတိုင်းဒေသကြီးအနေနဲ့ နယ်မြေတည်ငြိမ် အေးချမ်းမှုရှိပြီးလမ်းပန်းဆက်သွယ်ရေးကောင်းမွန်မှုရှိတာကြောင့် ငွေဆောင်၊ ချောင်းသာကမ်းခြေဒေသကို လာရောက်ကြတဲ့ ခရီးသွားဧည့်သည်တွေဟာ ကိုဗစ်ကာလအပြီး နောက်ပိုင်းမှာ သိသိသာသာပိုမိုတိုးတက်လျက်ရှိရာ ခရီးသည်ဝင်ရောက်မှုစာရင်းများ စနစ်တကျမှတ်တမ်းထားရှိရန်လိုအပ်ပါကြောင်း၊ ဟိုတယ်၊ တည်းခိုရိပ်သာ၊ တည်းခိုခန်းများမှ နေ့စဉ်တည်းခိုကြတဲ့ ဧည့်သည်စာရင်းအချက်အလက်များကို သက်ဆိုင်ရာ ဌာနဆိုင်ရာများသို့ Online မှတဆင့် လွယ်ကူလုံခြုံလျှင်မြန်စွာပေးပို့နိုင်ရေး ဧည့်သည်စာရင်းစီမံခန့်ခွဲမှုစနစ် (Guest List Management System - GLMS) ကို ဟိုတယ်နှင့်ခရီးသွားလာရေးဝန်ကြီးဌာနက လိုင်စင်ရယူထားသော ဟိုတယ်နှင့် တည်းခိုရိပ်သာများမှအသုံးပြုလျက်ရှိပါကြောင်း၊ ယခုအခါတွင် သက်ဆိုင်ရာ စည်ပင်သာယာရေးအဖွဲ့များမှ လိုင်စင်ရယူလုပ်ငန်းဆောင်ရွက်နေသည့် တည်းခိုခန်းများတွင် တစ်ပြေးညီအသုံးပြုရေးအတွက် ဆက်လက်ဆောင်ရွက်မှာဖြစ်ပါကြောင်း၊ မဖြစ်မနေသုံးစွဲရမည့် စနစ်ဖြစ်တဲ့အတွက် ယခုတက်ရောက်လာတဲ့ မြို့စည်ပင်သာယာရေးအဖွဲ့များမှ ဝန်ထမ်း ကိုယ်စားလှယ်များအနေဖြင့် သေချာလေ့လာမှတ်သားပြီး မိမိမြို့နယ်ရှိ တည်းခိုခန်းများကို ပြန်လည်ဆင့်ပွား သင်တန်းပို့ချသွားရမှာဖြစ်ပါကြောင်းနှင့် ဧရာဝတီ တိုင်းဒေသကြီးရဲ့ ခရီးသွားလုပ်ငန်းဖွံ့ဖြိုးတိုးတက်စေရေး၊ လုံခြုံစိတ်ချရသည့် ဧည့်သည်စာရင်း စီမံခန့်ခွဲမှုစနစ် (GLMS) ကိုအသုံးပြုရင်းခရီးသွားလုပ်ငန်းများ ပိုမိုဖွံ့ဖြိုးတိုးတက်စေရေး တက်ရောက်လာသူများအားလုံးက ပူးပေါင်းဆောင်ရွက်ကြရန်ပြောကြားခဲ့သည်။ ထို့နောက် တိုင်းဒေသကြီးဝန်ကြီးချုပ်နှင့် တက်ရောက် လာကြသူများမှ စုပေါင်း မှတ်တမ်းတင် ဓါတ်ပုံများရိုက်ကူးခဲ့ကြသည်။

ဧရာဝတီတိုင်းဒေသကြီး ဝန်ကြီးချုပ်ဦးတင်မောင်ဝင်းသည် အစိုးရအဖွဲ့ဝင် ဝန်ကြီးများနှင့်အတူ ယနေ့ညနေပိုင်းက ပုသိမ်မြို့၊ ရွေပုသိမ်ဧည့်ရိပ်သာတွင် ပုသိမ်မြို့ပေါ်ရှိ မြို့မိ၊ မြို့ဖများနှင့်တွေ့ဆုံ၍ ဒေသဖွံ့ဖြိုးရေးလုပ်ငန်းများအတွက် ဆွေးနွေးဆောင်ရွက်ခဲ့သည်။ ထို့သို့တွေ့ဆုံရာတွင် တိုင်းဒေသကြီးဝန်ကြီးချုပ်က“ မြို့မိ၊ မြို့ဖများနှင့်တွေ့ဆုံခြင်းသည် ဒုတိယအကြိမ် တွေ့ဆုံခြင်းဖြစ်ပြီး ပထမအကြိမ်တွေ့ဆုံဆွေးနွေးမှုများအပေါ် ဆောင်ရွက်ပေးနိုင်မှုအခြေအနေများနှင့် မိမိတို့ဒေသဖွံ့ဖြိုးတိုးတက်ရေး၊ မြို့သန့်ရှင်းသာယာ လှပရေးအတွက်လည်းဖြစ်ပါကြောင်း၊ တိုင်းဒေသကြီးသည် ခရီးသွားလုပ်ငန်းများဖွံ့ဖြိုးသည့် အတွက် ခရီးသွားများ သွားရေးလာရေးအဆင်ပြေစေရေး ရန်ကုန်-ပုသိမ်လမ်းမကြီးအား အဆင့်မြှင့်တင်နိုင်ရေး ဆောင်ရွက်လျက်ရှိပြီးလမ်းပိုင်းများအလိုက် ပြုပြင်ခြင်းလုပ်ငန်းများ ကိုလည်းဆောင်ရွက်ပေးလျက်ရှိပါကြောင်း၊ ယာဉ်လမ်းအသုံးပြုသူများမှ ယာဉ်စည်းကမ်းလမ်းစည်းကမ်းနှင့်အညီ စနစ်တကျအသုံးပြုစေလိုပါကြောင်း၊ စိုက်ပျိုးရေးနှင့်ပတ်သက်ပါက ဧရာဝတီတိုင်းဒေသကြီးသည် စံပြတိုင်းဒေသကြီးဖြစ်ရန်နှင့် ပန်းတိုင်အထွက်နှုန်းများရောက်ရှိရန် ကြိုးပမ်းဆောင်ရွက်လျက်ရှိပါကြောင်း၊ စားသုံးဆီဖူလုံစေရေးအတွက် နေကြာအပါအဝင် မြေပဲ၊ နှမ်းစသည့် ဆီထွက်သီးနှံများတိုးချဲ့စိုက်ပျိုးလျက်ရှိရာ ယခုနှစ်တွင်နေကြာစိုက်ပျိုးရေးလုပ်ငန်း များပိုမိုဖြစ်ထွန်းအောင်မြင်လာပါကြောင်း၊ MSME လုပ်ငန်းများအနေဖြင့် မိမိတို့တိုင်းဒေသကြီးမှ ထွက်ရှိသည့် ကုန်ကြမ်းများကိုအသုံးပြု၍ ထုတ်လုပ်သောပစ္စည်းများဖြစ်ရန် ဆောင်ရွက်လျှက် ရှိကြောင်းနှင့် ထုတ်ပိုးစနစ်များပိုမိုကောင်းမွန်စေရေး၊ ရေရှည်အသုံးပြုနိုင်စေရေးနှင့် ပြည်တွင်းပြည်ပတင်ပို့ နိုင်ရေးဆောင်ရွက်ရန်လိုပါကြောင်း၊ ပုသိမ်လေယာဉ်ကွင်းအား အဆင့်မြှင့်တင်ဆောင်ရွက်နေမှု၊ ပုသိမ်မြို့အဝင်လမ်းအား အဆင့်မီဆောင်ရွက်နိုင်ရေး ဆောင်ရွက်လျက်ရှိပါကြောင်း၊ ကုန်စည်ဒိုင်ဖွင့်လှစ်နိုင်ရေးမြေနေရာရှာဖွေခြင်းနှင့် ရေရှည် အသုံးပြုနိုင်စေရေး စဉ်းစားဆောင်ရွက်ကြရမှာဖြစ်ပါကြောင်း၊ ဆားလုပ်ငန်းတောင်သူများ အတွက် ဆားပိုမိုထုတ်လုပ်နိုင်စေရေး၊ လုပ်ငန်းများပိုမိုအဆင်ပြေစေရေးနှင့် ချေးငွေများရရှိ နိုင်စေရေးဆောင်ရွက်ပေးလျက်ရှိပါကြောင်း၊ မြန်မာ့ရိုးရာယဉ်ကျေးမှု အဆို၊ အက၊အရေး၊ အတီးပြိုင်ပွဲတွင် အောင်မြင်မှုများရရှိနိုင်ရေးအတွက်လည်း သက်ဆိုင်ရာဝန်ကြီးများအား တာဝန်ပေးဆောင်ရွက်ထားရှိပြီး ဘာသာရပ်အားလုံးဝင်ရောက်ယှဉ်ပြိုင်နိုင်စေရေးဆောင်ရွက် လျက်ရှိပါကြောင်း၊ မြန်မာ့ရိုးရာသင်္ကြန်ပွဲတော်အား ယခင်နှစ်များနည်းတူ စည်ကားသိုက်မြိုက် စွာကျင်းပနိုင်ရေးနှင့် ဌာနဆိုင်ရာအလိုက်၊ရပ်ကွက်အလိုက် ဖျော်ဖြေရေးမဏ္ဍပ်၊ ရေကစား မဏ္ဍပ်များဆောက်လုပ်နိုင်စေရေးနှင့်ပြည်သူများအားလုံးပျော်ရွှင်စွာပါဝင်ဆင်နွှဲနိုင်စေရေးဆောင်ရွက်လျက်ရှိပါကြောင်း၊ MSME လုပ်ငန်းများပိုမိုတိုတက်စေရေးနှင့် One Region One Product ထုတ်ကုန်များထုတ်လုပ်နိုင်စေရေး ဆွေးနွေးပေးကြစေလိုကြောင်း၊ စပါးခွံလောင်စာ အသုံးပြု၍ Gasifier၊ ဘွိုင်လာစနစ်များဖြင့် လျှပ်စစ်လိုအပ်ချက်ကို တစ်ဖက်တစ်လမ်းမှ ဖြည့်ဆည်းဆောင်ရွက်ပေးလျက်ရှိပြီး စပါးခွံ ထွက်ရှိမှု၊ တိုင်းအတွင်းလုံလောက်စွာရရှိနိုင်မှုနှင့် တိုင်းပြင်ပထွက်ရှိမှု၊ စပါးခွံလောင်စာတောင့်များထုတ်လုပ်နိုင်မှုကြောင့် သစ်တောပြုန်းတီးမှု လျော့နည်းလာစေရေး ဆောင်ရွက်လျက်ရှိပါကြောင်း၊ မြို့မိမြို့ဖများကလည်း မိမိတို့တိုင်းဒေသကြီး ဘက်စုံကဏ္ဍစုံ စနစ်တကျဖွံ့ဖြိုးတိုးတက်လာ စေရေးအတွက် အကြံပြုဆွေးနွေးပေးကြရန် ” ဆွေးနွေးပြောကြားခဲ့သည်။ ဆက်လက်၍ မြို့မိ၊ မြို့ဖများက ဒေသဖွံ့ဖြိုးရေး၊ မြို့သန့်ရှင်းသာယာလှပရေးများတွင် ပြည်သူများပူးပေါင်းဆောင်ရွက်မှု၊ မီးရထားလမ်း၊ ကားလမ်းများ အဆင့်မြှင့်တင်ပေးနိုင်ရေး၊ ပုသိမ်မြို့ကမ်းနားလမ်း အဆင့်မြှင့်တင်ပေးနိုင်မှုကြောင့် ကမ်းနားလမ်းတစ်လျှောက်နှင့် ရေပေါ်ဈေး တို့တွင် ညနေပိုင်း အပန်းဖြေဈေးဝယ်သူများနှင့် စည်ကားနေမှုများ၊ ဆားလုပ်ငန်း ဖွံ့ဖြိုးတိုးတက်ရေးအတွက် ဆောင်ရွက်ပေးနိုင်မည့် အခြေအနေများ၊ MSME လုပ်ငန်းများ ဖွံ့ဖြိုးတိုးတက်စေရေးအခြေအနေများ၊ စိုက်ပျိုးရေး လုပ်ငန်းမျာတိုးတက်လာမှုနှင့် ပြည်သူများ၏ လူမှုစီးပွားများတိုးတက်လာမှုအခြေအနေများ၊ စပါးခွံထွက်ရှိမှု၊ တိုင်းပြင်ပထွက်ရှိမှု အခြေအနေ များ၊ စွန့်ပစ်အမှိုက်များမှတစ်ဆင့် လျှပ်စစ်ထုတ်လုပ်နိုင်မှု၊ ပုသိမ်မြို့ရှိဈေးများ အဆင့်မြှင့်တင် ဆောင်ရွက်ပေးနိုင်ရေးဆွေးခဲ့ကြပြီး တိုင်းဒေသကြီးဝန်ကြီးချုပ်နှင့် အစိုးရအဖွဲ့ဝင်များမှ ဆွေးနွေးမှုများအပေါ် လိုအပ်သည်များဖြည့်စွက်ဆွေးနွေးခဲ့ကြကြောင်းသိရသည်။

ဧရာဝတီတိုင်းဒေသကြီး၊ ပုသိမ်ခရိုင်၊ ပုသိမ်မြို့နယ်၊ မရမ်းချောင်းကျေးရွာရှိ တောင်သူ ဦးမြင့်သိန်း၏ စိုက်ဧက( ၁၀)ဧက တွင် စိုက်ပျိုးထားသည့် ဆီထွက်သီးနှံနေကြာ Super Sun 41 ဆောင်းနေကြာစံကွက်ရိတ်သိမ်းပွဲကို ယနေ့နံနက်ပိုင်းက ပြုလုပ်ခဲ့ရာ တိုင်းဒေသကြီးဝန်ကြီးချုပ် ဦးတင်မောင်ဝင်းသည် တာဝန်ရှိသူများနှင့်အတူ သွားရောက်ကြည့်ရှုအားပေးခဲ့သည်။ ဦးစွာ တိုင်းဒေသကြီးဝန်ကြီးချုပ်နှင့်အဖွဲ့သည် နေကြာစံကွက် ရိတ်သိမ်းနေမှုများကို ကြည့်ရှုအားပေးပြီး ဌာဆိုင်ရာများ၊ ဒေသခံတောင်သူများနှင့်ရင်းရင်းနှီးနှီးတွေ့ဆုံ၍ တိုင်းဒေသကြီးဝန်ကြီးချုပ်က ရိတ်သိမ်းချိန်လေလွင့်မှုမရှိစေရေး၊ ဆီထွက်သီးနှံနေကြာ တိုးချဲ့ စိုက်ပျိုးနိုင်ရေး၊ အပွင့်အရေအတွက် အရွယ်အစားအလိုက်အောင်စေ့ထွက်ရှိမှု၊ မျိုးရွေးချယ်မှုများ၊ အထွက်နှုန်းများ၊ နေကြာဆီကြိတ်ခွဲမှုများအားစနစ်တကျမှတ်တမ်းထားရှိရန်၊ အထွက်တိုး မျိုးကောင်းမျိုးသန့်များ တိုးချဲ့စိုက်ပျိုးရန်နှင့် ရိတ်သိမ်းပြီးနေကြာပင်များအား သဘာဝမြေသြဇာ များပြုလုပ်၍ အကျိုးရှိစွာ အသုံးပြုရန်မှာကြားခဲ့ပါသည်။ အဆိုပါ ( Super sun-41 )ဆောင်းနေကြာစံပြကွက် ရိတ်သိမ်းရာမှ (၁)ဧကလျှင် နေကြာတင်း ပျမ်းမျှ (၂၈.၂၅)တင်း ထွက်ရှိခဲ့ပြီး တိုင်းဒေသကြီးအတွင်းရှိ မြို့နယ်(၂၆) မြို့နယ် တွင် (၁)မြို့နယ်လျှင် နေကြာ (၁၀)ဧက စံပြစိုက်ခင်းများထူထောင်၍ ဆီဖူလုံမှုရှိစေရေး တောင်သူများကို အသိပညာပေးဆောင်ရွက်ခဲ့ကြောင်းသိရသည်။

(၇၉)နှစ်မြောက် တပ်မတော်နေ့ကို ကြိုဆိုဂုဏ်ပြုသောအားဖြင့် မြို့ပြနှင့်အိမ်ရာဖွံ့ဖြိုးရေးဦးစီးဌာနမှ ၂ဝ၂၃-၂ဝ၂၄ ဘဏ္ဍာရေးနှစ်အတွင်း တိုင်းဒေသကြီးငွေလုံးငွေရင်းရန်ပုံငွေဖြင့် ဆောင်ရွက်ခဲ့သောကျုံပျော်မြို့ (၄)ခန်းတွဲ(၄)ထပ်ဝန်ထမ်းအိမ်ရာ ဖွင့်ပွဲအခမ်းအနားဖွင့်ပွဲအား ယနေ့နေ့လည်ပိုင်းတွင် ကျုံပျော်မြို့၊ အဆိုပါဝန်ထမ်းအိမ်ရာတွင်ပြုလုပ်ခဲ့ရာ ဧရာဝတီတိုင်းဒေသကြီး ဝန်ကြီးချုပ် ဦးတင်မောင်ဝင်းသည် တိုင်းဒေသကြီးအစိုးရအဖွဲ့ဝင်ဝန်ကြီးများ၊ တိုင်း၊ ခရိုင်၊ မြို့နယ်ဌာနဆိုင်ရာများတက်ေရာက်ဖွင့်လှစ် ပေးခဲ့သည်။ ဦးစွာ အိမ်ရာဖွင့်ပွဲအား တိုင်းဒေသကြီးဝန်ကြီးချုပ်နှင့်တာဝန်ရှိသူများက ဖဲကြိုးဖြတ်ဖွင့်လှစ်ပေးခဲ့ပြီး စုပေါင်းမှတ်တမ်းတင်ဓာတ်ပုံများ ရိုက်ကူးခဲ့သည်။ ထို့နောက် မြို့ပြနှင့်အိမ်ရာဖွံ့ဖြိုးရေးဦးစီးဌာန၊ ညွှန်ကြားရေးမှူးက တိုင်းဒေသကြီးဝန်ကြီးချုပ်နှင့် တာဝန်ရှိသူများထံသို့ ဝန်ထမ်းအိမ်ရာဖွင့်ပွဲအမှတ်တရပစ္စည်းများပေးအပ်ခဲ့ပြီး ဝန်ကြီးချုပ်နှင့်ဧည့်သည်တော်များသည် ဝန်ထမ်းအိမ်ရာသစ်အား လှည့်လည်ကြည့်ရှုစစ်ဆေးခဲ့ပြီး ဝန်ထမ်းအိမ်ရာတွင် နေထိုင်သည့် နိုင်ငံ့ဝန်ထမ်းများအနေဖြင့် ဝန်ထမ်းအိမ်ရာရှိ အိမ်ခန်းများအားလည်း ရေရှည်တည်တံ့အောင် ထိန်းသိမ်းသွားကြရန်၊ မိမိတို့၏ အခန်းများ သန့်ရှင်းသပ်ရပ်ရေးအပြင် ပတ်ဝန်းကျင်စိမ်းလန်းစိုပြေရေး၊ သန့်ရှင်းသာယာစေရေး၊ အိမ်ရာများသန့်ရှင်းသာယာလှပရေးနှင့် ရေရှည်တည်တံ့အောင် ဝိုင်းဝန်းကြိုးပမ်းဆောင်ရွက်ကြရန်မှာကြားခဲ့သည်။ ထို့နောက် တိုင်းဒေသကြီးဝန်ကြီးချုပ်သည် ကျုံပျော်မြို့အမှတ်(၂)အခြေခံပညာနှင့်စက်မှု၊ စိုက်ပျိုး၊ မွေးမြူရေးအထက်တန်းကျောင်း စံပယ်ဆောင် ကျောင်းဆောင်သစ်အား တာဝန်ရှိသူများနှင့်အတူ ဖွင့်လှစ်ပေးခဲ့သည်။ ထို့နောက် စုပေါင်းမှတ်တမ်းတင်ဓာတ်ပုံများ ရိုက်ကူးခဲ့ကာ ကမ္ဗည်းမော်ကွန်းအား အမွှေးနံ့သာရည်များ ပက်ဖျန်းပေးခဲ့ပြီး ကျောင်းဆောင်သစ်အား လှည့်လည်ကြည့်ရှုစစ်ဆေးခဲ့ပြီးလာမည့်ပညာသင်နှစ်တွင် ကျောင်းသားကျောင်းသူများတက်ရောက်နိုင်စေရေး၊ ကျောင်းဆောင်သစ်အားရေရှည်တည်တံ့စေရေးစနစ်တကျထိမ်းသိန်းစေရေးနှင့် သန့်ရှင်းသပ်ရပ်မှုရှိစေရေးဆောင်ရွက်ရန်မှာကြားခဲ့ကြောင်းသိရသည်။