ပုသိမ်      ဇူလိုင်     ၂၀

ဧရာဝတီတိုင်းဒေသကြီးဝန်ကြီးချုပ်နှင့်အဖွဲ့သည် ကျုံပျော်ခရိုင်၊ ရေကြည်မြို့နယ်၊ ငါးသိုင်းချောင်းမြို့၊ ရှေ့ဆောင်ရပ်ကွက်ရှိ ငဝန်တာမိုင်(၄၇/၂)အနီးရှိငါးသိုင်းချောင်းရေမှတ်စခန်းနှင့် ရွှေဘိုရပ်ကွက်ရှိ ဗောဓိတာရေကင်းစခန်း (တာမိုင်-၄၆)သို့ သွားရောက်ကြည့်ရှုစစ်ဆေးရာ ဆည်မြောင်းနှင့် ရေအသုံးချမှုစီမံခန့်ခွဲရေးဦးစီးဌာန မြို့နယ်ဦးစီးမှူးက ၂၀၁၅ ခုနှစ်မှစ၍ မြစ်ရေမြင့်တက်အခြေအနေ၊ နေ့၊ ည ရေကင်းလှည့်လည်စစ်ဆေးခြင်း တာဝန်ချထားမှုအခြေအနေများ၊ လက်ရှိငဝန်မြစ်ရေအမှတ်သည်( ၂၈.၀၀ ) ပေရှိပါကြောင်းနှင့် စိုးရိမ်ရေအမှတ်သို့ရောက်ရှိနေပြီဖြစ်ပြီး အန္တရာယ်ရေအမှတ်သည် ( ၃၂.၃၅ )ပေဖြစ်ပါကြောင်း ရှင်းလင်းတင်ပြမှုအပေါ် တိုင်းဒေသကြီးဝန်ကြီးချုပ်က မြစ်ရေမြင့်တက်လာပြီး စိုးရိမ်ရေမှတ်သို့ ရောက်ရှိ‌ေနပြီဖြစ်သဖြင့် ရေဘေးကာကွယ်ရေး တာတမံများ၏ အရေးပေါ်အခြေအနေ ကြိုတင်စီမံခန့်ခွဲမှုအစီအစဉ်အရ လွှင့်ထူရမည့် သတိပေးအချက်ပြအလံ လွှင့်ထူခြင်းအခြေအနေများ သိရှိနားလည်ထားကြရန်၊ သဘာဝဘေး အန္တရာယ်များကို အချိန်မီကြိုတင် ကာကွယ်နိုင်ရန်အတွက် တာတမံများ တာဝန်ချထားသည့် ရေကင်းအဖွဲ့များ၊ ဌာနဆိုင်ရာ ကြီးကြပ်ရေးအဖွဲ့များ၊ ဒေသခံပြည်သူများက ရေဘေးကာကွယ်ရေး နည်းလမ်းများအတိုင်း ဂရုတစိုက်စောင့်ကြည့်ကြရန်၊ ထူးခြားမှုရှိပါကအ ချိန်နှင့်တစ်ပြေးညီ သတင်းပေးပို့ခြင်းလုပ်ငန်းများကိုမြန်ဆန်မှန်ကန်စွာ ဆောင်ရွက်ကြရန်နှင့် သဘာဝဘေးကာကွယ်ရေးလုပ်ငန်းများတွင် ဒေသခံပြည်သူများ၊ ဌာနဆိုင်ရာများကတက်ညီလက်ညီပူး ပေါင်းဆောင်ရွက်ကြရန်” မှာကြားခဲ့သည်။

ထို့နောက် တိုင်းဒေသကြီးဝန်ကြီးချုပ်နှင့်အဖွဲ့သည် ဟင်္သာတခရိုင်၊ လေးမျက်နှာမြို့နယ်၊ ခတ္တူကျေးရွာ  စတုမုခစေတီတော်ကြီးသို့ရောက်ရှိ၍ ငဝန်သစ္စာရွှေဧရာ ပရိယတ္တိစာသင်တိုက် ဆရာတော်အား ဖူးမြော်ကြည်ညို၍ သာသနာရေးဆိုင်ရာ ကိစ္စရပ်များအား တင်ပြလျှောက်ထားကာ လှူဖွယ်ဝတ္ထုပစ္စည်းများ ဆက်ကပ်လှူဒါန်းခဲ့သည်။ ယင်းနောက်  စတုမုခစေတီတော်ကြီးအား လှည့်လည်ဖူးမြော်ကြည်ညိုခဲ့ပြီး ကမ်းပြိုကာကွယ်ရေးလုပ်ငန်းအားကြည့်ရှုစစ်ဆေးရာ ရေအရင်းအမြစ်နှင့်မြစ်ချောင်းများဖွံ့ဖြိုးတိုးတက်ရေးဦးစီးဌာနမှ ခရိုင်ဦးစီးမှူးက  ၂၀၂၄ - ၂၀၂၅ ဘဏ္ဍာရေးနှစ်တွင် Bored Pile အခြေပြု ကျောက်ပြားကပ်တမံအလျား(၁၃၉၃)ပေ၊ သဲအိတ်ခံကျောက်စီရေကာများ(၈၇၀)ပေ၊ ထူပါရုံစေတီတော်ရင်ပြင်မြှင့်ခြင်း၊ ကျောက်ပြားကပ်ခြင်း ဆောင်ရွက်ပြီးစီးမှုအခြေအနေများ၊ ၂၀၂၅-၂၀၂၆ ဘဏ္ဍာရေးနှစ်တွင် Bored Pile အခြေပြုကျောက်ပြားကပ်တမံအလျား (၈၀၀)ပေ၊ သောင်တူးခြင်း အလျား(၁၂၀၀)မီတာ ဆောင်ရွက်မည့်အခြေအနေများ၊ ငဝန်မြစ်ရေလမ်းအခြေအနေနှင့် လက်ရှိငဝန်မြစ်ရေမှာ လေးမျက်နှာ မြို့တွင် ၃၃.၁၀ ပေရှိပြီး စိုးရိမ်ရေမှတ်မှာ ၃၄ ပေ ဖြစ်သည့်အခြေအနေများအား ရှင်းလင်းတင်ပြရာ တိုင်းဒေသကြီးဝန်ကြီးချုပ်က မြစ်ရေမြင့်တက်မှုနှင့် မြစ်ရေမှတ်များအား ဂရုတစိုက်စောင့်ကြည့်ကြရန်၊ ထူးခြားမှုရှိပါကအ ချိန်နှင့်တစ်ပြေးညီ သတင်းပေးပို့ခြင်းလုပ်ငန်းများကိုမြန်ဆန်မှန်ကန်စွာ ဆောင်ရွက်ကြရန်၊ ရှေးဟောင်းသမိုင်းဝင်စေတီတော်မြတ်ကြီးနှင့် သာသနိကအဆောက်အဦများ ရေရှည်တည်တံ့စေရေး ထိန်းသိမ်းဆောင်ရွက်ရန်မှာကြားခဲ့သည်။