ပုသိမ်       ဒီဇင်ဘာ       ၉

တိုင်းဒေသကြီးဝန်ကြီးချုပ်နှင့်အဖွဲ့သည် မြောင်းမြပညာရေးဒီဂရီကောလိပ်၊ မြရတုခန်းမတွင်ပြုလုပ်သည့် ပထမနှစ် သင်တန်းသား၊ သင်တန်းသူများ၏ မောင်မယ်သစ်လွင် ကြိုဆိုပွဲအခမ်းအနားသို့တက်ရောက်ခဲ့ရာ သင်တန်းသား၊ သင်တန်းသူများက အခမ်းအနားကို “ ပွင့်ဖူးဝေဆာ ကျောင်းတော်သာ” တေးသီချင်းဖြင့် သီဆိုဖွင့်လှစ်ခဲ့ပြီးနောက် တိုင်းဒေသကြီးဝန်ကြီးချုပ်အား သင်တန်းသား၊ သင်တန်းသူများက မြို့နယ်အလိုက် မိတ်ဆက်တင်ပြခဲ့သည်။

ထို့နောက် တိုင်းဒေသကြီးဝန်ကြီးချုပ်က“ တိုင်း​ဒေသကြီးအတွက် အားထားရသည့် ဆရာ၊ ဆရာများဖြစ်လာကြမည့် မောင်တို့မယ်တို့အား ရင်းနှီးနွေးထွေးစွာကြိုဆိုခြင်းဖြစ်ပါကြောင်း၊ တိုင်း​ဒေသကြီးသည် ​မြေခံ​ရေခံ​ကောင်းမွန်ပြီး လူ့စွမ်းအားအရင်းအမြစ်များ​ပေါများကာ ပညာ​ရေးကိုလိုလားသည့် တိုင်း​ဒေသကြီးဖြစ်ပါ​ကြောင်း၊  တိုင်းဒေသကြီးအစိုးရအဖွဲ့အ​နေဖြင့် ကျောင်းနေအရွယ်ကလေးအားလုံး ရာနှုန်းပြည့်ကျောင်းတက်ရောက်စေရေးနှင့် အတန်းစဉ်ကူးပြောင်းမှုများ မကျန်ရှိစေရေးအတွက် သက်ဆိုင်ရာ တာဝန်ရှိသူများနှင့် ပူးပေါင်းဆောင်ရွက်လျက်ရှိပါကြောင်း၊ ကျောင်းသား၊ ကျောင်းသူများသည် ဆရာ၊ ဆရာမများ၏ သွန်သင်ဆုံးမမှုများအောက်တွင် ကြီးပြင်းကြရမည့်သူများဖြစ်ပါကြောင်း၊ တပည့်များ၏ ကိုယ်ရည်ကိုယ်သွေးနှင့် စွမ်းရည်သတ္တိများ မြင့်သည်ထက်မြင့်အောင် ပြုစုပျိုးထောင်ပေးကြရမည့်သူများဖြစ်ပါကြောင်း၊ အများအကျိုးအတွက် ကိုယ်ကျိုးမဖက် ဆောင်ရွက်တတ်သူများလည်း ဖြစ်ကြပါကြောင်း၊ မိမိတို့၏ တပည့်များအားသင်ကြားပေးရမည့် ဆရာ၊ ဆရာများသည် ထူးထူးချွန်ချွန်ထက်ထက်မြက်မြက်ဖြစ်အောင် ဦးစွာကြိုးစားသင်ယူ​လေ့လာကြရမည်ဖြစ်ပါကြောင်း၊ နိုင်ငံတော်နှင့်တိုင်းဒေသကြီးအတွက် အားကိုးအားထားပြု နိုင်သည့် ဆရာ၊ ဆရာမများ ဖြစ်စေရေးကြိုးစားကြရန်လိုအပ်သကဲ့သို့ ဗလငါးတန်နှင့်ပြည့်စုံသည့်လူငယ်လူရွယ်များဖြစ်အောင် ပြုစုပျိုးထောင်နိုင်ကြသည့် ဆရာ၊ ဆရာမများဖြစ်ကြပါစေကြောင်း” တိုက်တွန်းအမှာစကားပြောကြားခဲ့ပြီး ကျောင်းသား၊ကျောင်းသူများ အတွက် ထောက်ပံ့ငွေများပေးအပ်ရာ မြောင်းမြပညာရေးဒီဂရီကောလိပ်မှ ကျောင်းအုပ်ကြီးက လက်ခံရယူခဲ့သည်။ ထို့​နောက် တိုင်း​ဒေသကြီးဝန်ကြီးချုပ်နှင့်တာဝန်ရှိသူများသည် ​ကျောင်းသား၊ ​ကျောင်းသူများနှင့်အတူ ရင်းရင်းနှီးနှီး ​နေ့လယ်စာ အတူတကွ သုံး​ဆောင်ခဲ့ပါသည်။

ထို့နောက် တိုင်းဒေသကြီးဝန်ကြီးချုပ်နှင့်အဖွဲ့သည် ဘိုကလေးပညာရေးဒီဂရီကောလိပ်၊ ပညာဂုဏ်ရည်ခန်းမတွင်ပြုလုပ်သည့် ပထမနှစ် သင်တန်းသား၊ သင်တန်းသူများ၏ မောင်မယ်သစ်လွင် ကြိုဆိုပွဲအခမ်းအနားသို့တက်ရောက်ခဲ့ရာ သင်တန်းသား၊ သင်တန်းသူများက “တို့ကျောင်း တို့ဝန်းကျင်” သီချင်းသီဆို၍ ဖွင့်လှစ်ပေးခဲ့သည်။

ဆက်လက်၍ တိုင်းဒေသကြီးဝန်ကြီးချုပ်က“ မောင်တို့မယ်တို့သည် တက္ကသိုလ်ဝင်စာမေးပွဲအောင်မြင်ခဲ့ကြပြီး ဝါသနာကိုအရင်းခံကာ ပညာရေးလမ်းကြောင်းကိုရွေးချယ်ခဲ့သူများဖြစ်ပါကြောင်း၊ လေးနှစ်တာသင်တန်းများပြီးဆုံးသည့်အခါ တိုင်းဒေသကြီးအတွင်းရှိ အခြေခံပညာကျောင်းများတွင် တာဝန်များထမ်းဆောင်ကြရမည်ဖြစ်ပါကြောင်း၊ မောင်တို့မယ်တို့သည် နိုင်ငံ့တာဝန်များကို ပုခုံးပြောင်းထမ်းဆောင်ကြရမည့် လူငယ်လူရွယ်များကို သင်ကြားပေးကြရမည့်သူများဖြစ်၍ မိမိတို့ကိုယ်တိုင် အရည်အချင်းများပြည့်ဝရန်လိုအပ်ပြီး ​ကျောင်း​တော်ကြီးမှ သင်ကြား​ပေးသည့် ပညာရပ်များကို နှစ်စမှပင် ကြိုးစားသင်ယူလေ့လာကြရမည်ဖြစ်ပါကြောင်း၊ ဗလငါးတန်နှင့်ပြည့်စုံသည့်လူငယ်လူရွယ်များဖြစ်အောင် ပြုစုပျိုးထောင်နိုင်ကြသည့် ဆရာ၊ ဆရာမများဖြစ်ကြပါစေကြောင်း” တိုက်တွန်းအမှာစကားပြောကြားခဲ့သည်။ ယင်းနောက် တိုင်းဒေသကြီးဝန်ကြီးချုပ်အား သင်တန်းသား၊ သင်တန်းသူများက မြို့နယ်အလိုက် မိတ်ဆက်တင်ပြခဲ့သည်။ ထို့နောက် ကျောင်းသား၊ ကျောင်းသူများ အတွက် ထောက်ပံ့ငွေများပေးအပ်ရာ ဘိုကလေး ပညာရေးဒီဂရီကောလိပ်မှ ကျောင်းအုပ်ကြီးက လက်ခံရယူခဲ့သည်။