ပုသိမ် နိုဝင်ဘာ ၂၉

၂၀၂၄ခုနှစ်၊ အပြည်ပြည်ဆိုင်ရာ မသန်စွမ်းသူများနေ့ကို ကြိုဆိုဂုဏ်ပြုသောအားဖြင့် ဧရာဝတီတိုင်းဒေသကြီးလူငယ်ရေးရာကော်မတီမှ ကြီးမှူးကျင်းပသည့် မသန်စွမ်းပြေးခုန်ပစ် ပြိုင်ပွဲကို ယနေ့နံနက်ပိုင်းက ပုသိမ်မြို့၊ ကိုးသိန်းအားကစားကွင်းတွင် ပြုလုပ်ခဲ့ရာ တိုင်းဒေသကြီး ဝန်ကြီးချုပ်ဦးတင်မောင်ဝင်း တက်ရောက်ဖွင့်လှစ်ပေးခဲ့ပြီး ဆုများချီးမြှင့်ခဲ့သည်။

ဦးစွာ တိုင်းဒေသကြီးဝန်ကြီးချုပ်သည် မသန်စွမ်း (အမျိုးသား)မီတာ၁၀၀ပြိုင်ပွဲများအား သေနတ်ပစ်ဖောက်၍ စတင်တာလွှတ်ပေးသည်။ ယင်းနောက် တိုင်းဒေသကြီးဝန်ကြီးချုပ်နှင့် ဧည့်သည်တော်များသည် မသန်စွမ်း မီတာ၁၀၀ (ကျား၊ သက်ငယ်တန်း/ သက်ကြီးတန်း)၊ မီတာ၁၀၀ (မ) ပြိုင်ပွဲများ၊ မသန်စွမ်း သံလုံးပစ် ( ကျား/မ သက်ကြီးတန်း)၊ သံပြားပစ်( ကျား/မ သက်ငယ်တန်း) ပြိုင်ပွဲများနှင့် အမျိုးသား အားကစားပွဲတော်သို့ ဝင်ရောက်ယှဉ်ပြိုင်ရန် စခန်းသွင်း လေ့ကျင့်နေသည့် အမျိုးသားမီတာ၁၅၀၀၊ အမျိုးသား၊ အမျိုးသမီး မီတာ၄၀၀ လက်ဆင့်ကမ်း စံချိန်ယူပြိုင်ပွဲများအား ကြည့်ရှုအားပေးခဲ့သည်။

ထို့နောက် မသန်စွမ်းပြေးခုန်ပစ်ပြိုင်ပွဲ ဆုချီးမြှင့်ပွဲအခမ်းအနားကို ဆက်လက်ပြုလုပ်ရာ အမျိုးသမီး သံလုံးပစ်၊ သံပြားပစ်နှင့် မီတာ(၁၀၀)အပြေးပြိုင်ပွဲများတွင် ပထမ၊ ဒုတိယနှင့် တတိယဆုရရှိသည့် မသန်စွမ်းအားကစားသမားအား တစ်ဦးချင်းဆုတံဆိပ်များနှင့် ငွေသားဆု များကို တိုင်းဒေသကြီးဝန်ကြီးချုပ်၏ဇနီးကလည်းကောင်း၊ သက်ကြီးအမျိုးသားမီတာ(၁၀၀) အပြေးပြိုင်ပွဲ၊ သံပြားပစ်၊ သံလုံးပစ်နှင့် သက်ငယ်မီတာ (၁၀၀)အပြေးပြိုင်ပွဲများတွင် ပထမ၊ ဒုတိယနှင့် တတိယဆုရရှိသူများအား တစ်ဦးချင်းဆုတံဆိပ်များနှင့် ငွေသားဆုများကို တိုင်းဒေသကြီးဝန်ကြီးချုပ်ကလည်းကောင်း ဆုများချီးမြှင့်ခဲ့ကြပြီး မသန်စွမ်းအားကစားသမား များနှင့်အတူ စုပေါင်းမှတ်တမ်းတင် ဓာတ်ပုံများရိုက်ကူးခဲ့ကြသည်။ အပြည်ပြည်ဆိုင်ရာ မသန်စွမ်း သူများနေ့ကို ကြိုဆိုဂုဏ်ပြုသောအားဖြင့် ဧရာဝတီတိုင်းဒေသကြီးလူငယ်ရေးရာ ကော်မတီမှ ကြီးမှူးကျင်းပသည့် မသန်စွမ်းပြေးခုန်ပစ်ပြိုင်ပွဲကို ပုသိမ်၊ ဟင်္သာတ၊ မြောင်းမြ၊ မြန်အောင် ခရိုင်များမှ အားကစားသမား (၅၃)ဦးဝင်ရောက်ယှဉ်ပြိုင်ခဲ့ကြကြောင်းသိရသည်။